.formatted-text { text-align: center; font-weight: bold; white-space: pre-wrap; margin: 20px auto; } تتمة البارت const text = `صعيب تحس بظلم وهي عارفة راسها مادارت والو وكون ماكانتش مريضة ماكانتش غادير خطأ بحال هداك مشات عندو كاترعد كاتݣول هادي لخرة ليها عمرها تعتبها في هاد الخدمة...غير وصلات عندو رجليها فاشلين والخلعة مازال شاداها بلا ماتحس بغات تجلس على نيتها فوق الكرسي حتى حبسها بيديه.. أديب:خليك واقفة ماغانعطلكش..«شاف فيها مخنزر»:شنو هادشي درتي نتي!؟ أسيل«مابقاتش قادرة غير كاتصبر راسها نزلو دموعها»:سي أديب سمحلي عيانة بزاف وماشفتشي شنو كنت كانكتب خطأ وقع وكانعتارف بيه .. أديب:عيانة!؟نعطيك ترتاحي ماشي تخرجي ليا على الخدمة ..أول وأخر مرة غانبهك الخدمة مافيهاش لعب و اخطاء بحال هادي غتخصرنا لكليان «خشا يديه في جياب سروال كايشوف فيها بتدقيق»:سيري كملي خدمتك ولا شوفي شي حل لراسك حركات راسها وخرجات مهدودة من عندو كلها كتغزل زادها بهضرتو وهي لي فيها يكفيها غير وصلات عند ريم وهي طيح على طولتها حتى تسمعات الخبطة ديال راسها مع الأرض وتجمعو عليها .. لمحها فالكاميرة و خرج كايجري بلا عقل هز ليها راسها كايحاولو يفيقوها والو مغيبة... ريم«بخوف»:ماغاديشي تفيق خصا طبيب .. غير سمعها هزها خرجها للطوموبيل حطها لور و ريم حداها ...عفط عفطة وحدة لكلينيك ...راسو غاينفاجر بالأعصاب نهار دازز كحل زحل...غادي و كايسب و يصوط غير بوحدو..وصلو لكلينيك نزل هزها دخلوها المستعجلات...علقو ليها سيروم و عطاوها يبرة طمناتهم طبيبة عليها ومشات خلاتهم معاها ...أديب متكي على فوطوي لي حداها مغمض عينيه راسو كايغلي بلحزاق لي وقع ليه هاد نهار ريم حتى هي جالسة في لكرسي كاتسناها تفيق ... أديب«هز عينو في ريم»:جيتو تخدمو ماشي باش كل مرة ديرو لمشاكيل..كيفاش نتي مارديتش لبال les factures de ventes ريم:سمحلي اسي اديب تكلفت بشيكات وتلهيت على الوراق دالبيع «سكتات ورجعات شافت فيه»:أسيل تقطع يدا قبل ماتمدا نشي حاجة ماشي ديالا..ديكشي لي وقع خطأ و مايتعاودشي.. هي كانت عيانا نهار كامل وهي مريطة براسا... عندا Syndrome migraineux (متلازمة الصداع النصفي):كايفشلا عينا ماكاتبقاشي تقشع بيهم... أديب: لي وقع وقع مرة خرا يلا عيانة ترتاح انا ماغانزيرش عليها «ناض وقف»:بقاي معاها حتى يكمل سيروم انا غانمشي يلا خاصكم شي حاجة صوني عليا ريم:واخا ا سي أديب شكرا و سمحلنا هزات تيليفونها صيفطات ميساج لجلال ورجعات كاتشوف قدامها وعقلها غاايب ... فلاش باك طنجة في كلينيك واقفة كاتسنا طبيبة شنو غاتقول ليهم خايفة عليها بزاف اسبوع وهي لحريق ف راسها ولي كلاتها كاترجعها ..الألم كل نهار كايزيد ..كايقولو راه شي حاجة عندها في راسها..وكل نهار صحتها كاتقلال ملي مات خوها وهي على حالها .. طبيبة:نتينا لي جبتيها !؟ ريم:اه انا لي جبتا ..كيف بقات شعندا طبيبة: الصراحة عندا les Nerfs de l'estomac (اعصاب المعدة) وعندا حتى la Syndrome du côlon irritable (القولون العصبي) ...و خاصا حتى تحاليل دفقر الدم حالتا ضعيفة بزاف..... اما حريق دالراس من الأعصاب فابسباب la migraine aiguë (شقيقة الحادة) يعني فكل مرة كتعصب كايزيد الألم مع الأعصاب وحتى يلا تعرضات لتوتر...مهم لنقدر نقولك هو خصا تبعد ما امكن على التوتر و لا شي حاجة تعصبا .. الحمد لله على سلامتا تقدر تدخل تشوفا ريم«تنهدات بحزن على حال صاحبتها »:واخا ا دكتورة شكرا بزااف ... اند فلاش با ساعة دازت وسيروم كمل عاد فاقت راسها كاتحس بيه مبنج ..حلات عينيها ف صاحبتها لي كانت ساهيا بحال يلا غرقو لجدها لبابرر مافاقت غير على صوتها .. أسيل:ريم!! ريم: أسيل! فقتي الحبيبة ..كيبقيتي شويش دابا!؟ خلعتيني عليك.. أسيل[كتمسد على راسها]:اه..الحمد لله..شكون جابني نهنا؟! ريم:جابنا سي أديب ..شويش و يجي جلال يدينا ندار .. أسيل«تنهدات ملي سمعات أديب مشا ماكلفش راسو حتى يتسناها حتى تفيق»:جلال غانعدبوه معانا حتى هو كو شبرنا شي طاكسي ومشينا فحالنا حسن .. ريم«ميقت فيها»:الله يهديك يلا ماوقفشي معايا ملي نحتاجو فوقاش غايوقف معايا.. يشويني فيه يجي بزز منو ويدو فوق راسو .. مزيان تبارك الله أسيل«غمزاتها بعينها باش تسكت والو واش بغات تعيق»:رييييييم.. ريم:«رجعات لتزلال ديالها حطات يديها على حنكها»:كايقتلني يا ختي غير بديك الحروشة والرجولة لي فييييه...ايما قلبي..غي قلتلو أجي قالي دابا نكون عندك جلال«مربع ايدو على لكادر ديال لباب كايتصنت ليها»:زيدي كملي ريم«هزات راسها و ضارت مصدومة»:ج ..جلال جلال «جر رجليه عندهم ضربها ليها بواحد لغمزة دوب الحجر»:كنتي داويا عليا ولا ريم:احم..ها..من فوقاش ونتنا هنايا؟! جلال«قرب عندها»:ملي بديتي كاتهضري...راكي زلااايلية مع راسك وعينك وازنة كنت غالط فيك ريم«حناكها طلبو شرع بسخونية غايطرطقو»:احم ..سمعتني !![شافت ف أسيل لكانت مكرشخة بالضحك] نتينا كاضحك.. شفتك استحليتيها..نوض نمشيو سيروم تسالا أسيل«كاضحك »:عيت نغمز فيك وااالو نتينا كونتي معمية كتهضر عليه جلال«قرب حط ظهر يدو على حناكها»: اش هاد زين لمك نتي ممم...«شاف ف أسيل»:ختي أسيل مايكون باس .. أسيل:شكرا اخاي جلال سمحلنا عدبناك معانا حرك ليها راسو ..سبقهم قدامو باش يخرجو شدات أسيل ف ريم وخرجو داز جلال لريشيبسن لقا أديب خلص كلشي عاد خرج موراهم ركب وديمارا شد بيهم طريق لمرجان وصلو قدامو نزل غير جلال وخلاهم يتسناوه ..شوية بان ليهم خارج هاز ساشيات بزاف في يديه ..حطهم في لكوفر وطلع.. ريم مابغاتش تسول قالت يمكن تقدا ليه شي حاجة كملو طريقهم ساكتين حتى وقفو حدا لباب نزل حتى هو هز دوك ساشيات غادي بيهم حتى هضرات ريم.. ريم:جلال!شني ديكشي!؟ جلال:شي حاجات خديتهم ليكم لبنت مريضة وبوحدكم ماغاتبقايش كل شوية خارجة تصخري ..«بغات تهضر وحبسها»:زيدي ا ريم ماعنديش لخاطر لي نشرح ليك فيه خليني نطلع ليكم هادشي و نزل لخدمتي .. طلعو لدار جبدات ساروت حلات لباب دخل جلال تقدية وخرج تبعاتو ريم من بعد ما وصلات أسيل للبيت .. ريم«شداتو من دراعو كاتشوف فيه شوفة حنينة»:شكرا ا جلال .. جلال«ديك لمسة ديال يديها لمحطوطة عليه شعلات فمو لعافية خلاتو كايتشوا من لداخل تبورش »:اخر مرة نسمع هاد الكلمة ديال شكرا ...سيري دخلي خليني شاد وقري الله يرضي عليك ريم:واخا انا ندخل..تصبح على خير ..[ترددات قبل ما تنطق]رد بال نراسك.. جلال«قرب عندها طبع بوسة على جبهتها»:ردي غير نتي لبال لراسك انا بيخير يلا نتي بيخير .. حركات ليه راسها و بتاسمات..دخلات خلاتو مصمر في بلاصتو مازال مستمتع بريحتها لي خلاتها موراها..حتى نطق وعينو على لباب .. جلال:غير نتي وربي كبير... عند لبنات من بعد مادخلات كاتقلب فدوك ساشيات لي جاب لقاتو خدا ليهم سقايط منوعين وعاد لحليب شكلاط فروماج ياغورت مهم سقاطة لي كاتبغي كاينة داكشي ديال الفطور معلبات خدا ليهم ديسير مشكل لي باط منوعين لي صوص بقات غير كاتجبد وتحط حتى تلفات...قلبات على بطاطة لقاتها باقة ليهم من تقدية ديك المرة لي تقداو..جمعات شعرها لفوق ..وقطعاتها طريفات ودارتها تصلقات جبدات زبدة ولحليب ولفرماج قادات بيهم "بطاطا بيري" حيت كاتعجب أسيل دارت الكفتة في الفران ودخلات تبدل عليها على مايوجد لعشا ..لبسات بيجامة ستان خرجات لقات لكفتة وجدات قاداتها في طبيسلات مع ديك بيري وعيطات على أسيل لي كانت دوشات عليها ورتاحت غير شمات ريحة عرفاتها شنو طيبات خرجات كاضحك... أسيل:الزاين ديالي طيبتلي لعشا .. ريم:ايوا شني يسحابلك..نتينا رخيصة عندي ولا... أسيل[جرات ليها حناكها]:شكرا ا الحبيبة ديالي الله يخليك ليلي.... نتعشاو ونهضرو مع بهية.. ميكت عليها هاد اليوماين غنلقاها معصبة عليا عاود ... ريم:واخا تعشا وشرب دوا ديالك لي جبتي من معاك وخليتيه مرمي ..طبيبة كانت غاتكتب لك الدوا وقلتلا را عندا نفسو ف دار .. و لكن ا اسيل هاد مرة مخصكشي توقفو هادي الهضرة دالطبيبة ماشي ديالي ... أسيل:غانرجعو نهاد دوا عاود..«مخنوقة»..خلينا ناكلو بعدا ويحن الله ... تعشاو ساكتين غير كملو جابو سقاطة وجلسو مدوزين المكالمة واتساب ل لبهية .. dar bouazza مولات نخوة وتاويل ودار لكبيرة ..گالسة گلسة منخوية واخا دا منها زمان علاش ݣد ولكن زينة و يلا مشا زين يبقاو حروفو ..صينية ديال أتاي محطوطة قدامها بقوامو لوزز ولگرگاع اكاجو نوگة وتمر مهم من كلشي شوية .. مجمعين هي ولخدامة حاااشة واش تكون حاسباها خدامة ..حاسباها بنتها مشعلين تلفازة كايتفرجو ..حتى سمعوه رما سلامو عليهم ومن وجهو باين عيان ... خديجة:أديب!! ياك لباس وجهك باين فيه لعيا.. أديب«جا گلس حداها رجع راسو لور»:شي مشاكل في الخدمة صافي«تفكر أسيل»:لبنت لي جابها جلال داك نهار سخفات ف لخدمة وديتها لطبيب... خديجة«حطات يديها على حنكها»:اويلي علاش هادشي !؟واش لبنت لباس عليها... أديب«كايحك على جبهتو »:لباس الحاجة ما بيها والو خليتها مع صاحبتها غير يسالي ليها سيروم يمشيو لدار خديجة«خنزرات فيه»:ياك ا ولد كرشي خليتي لبنات بوحدهم وجيتي شكون غايوصلهم .. أديب «شاف فيها بستغراب»:مشا عندهم جلال غير بردي..نتي لبنت عرفتيها غير لبارح درتي عليها هاد لحالة.. خديجة:ايوا همي على لوليات..لبنات بوحدهم ولبنت مريضة اويلي أديب:صيفطت ليها مساج خليت ليها واحد 4 جوغ ترتاح فيهم عاد ترجع تخدم ..جبناهم من بعيد على حساب الخدمة ولكن كايبان ليا موراهم غير لمشاكل«زفر معصب»:حتى من جلال طاح على زنافرو بلا فرانات فختنا..الله يستر من لي جاي وصافي.. خديجة«شافت فيه مديقة عينيها فيه»:جلال خليه عليك بصحتو لقا لي توالمو...زعما نتا ما جراتك حتى حاجة والو الإحساس عندك مثلج اولد كرشي .. أديب«حاط يدو على قلبو وتنهد»: واااالو اميمتي واااالو هذا مبقايا غير رتاحي مع راسك«ناض جر رجليه جيهت دروج»:أنا غانطلع ندوش قولي لرقية توجد ليا شي حاجة خفيفة ناكلها.. خديجة« تنهدات على حال ولدها»:الله يهديك اولدي ..الله يهديك ويفرجها عليك طلع ديريكت لبيتو حيد حوايجو حتى رجع كي خلقاتو مو ..دخل لدوش طلق عليه لما مغمض عينيه كايتخايلها ملي كان هازها بين يديه شفايفها رموشها بياضها دقق فكولشي واخا فوقت قصير خطف فيها شوفة..خبط يدو مع لحيط مغزز على سنانو ماحاملش الوضع لي هو فيه..كايهضر مع راسو بحال لحمق... أديب:نحرق ديلمو هاد القلب يلا بغا شي نهار.. عند لبنات بهية: هادي هي ديالك ابنت كرشي فاين غابرة.. اسيل [بتاسمات ابتسامة خفيفة]: ماما ...كيف تنا بهية«باقا غتزيد تعايرها و هو يبان ليها وجه بنتها صفر»:لابس اماما ..نتينا لشعندك وجهك صفر ابنتي؟! اسيل: والو اما غي تعصبت مع الخدمة وصافي ...نتينا عارفاني ملي كنتعصب بهية[بحزن عارفة بنتها ]: كتشرب دوا ديالك ا أسيل و لا لاء؟! ريم: خالتو ملي جات مشرباتو .. مكتبغيشي تشربو ...وحتا اليوما الطبيب قالي خصا تشرب الدوا ديالا بهية: اوعدي يانا وصلتي حتا نطبيب ريم: اه اخالتو..و السباب ديالا هو ديك ولد لوسك لمصرداه يحضينا كان غيخرج عليها .... بهية: عماد ؟! اويلي وحدي شني عمل؟ اوا قزيبت ريم كاتشطح سرسبات ليها كولشي شنو وقع ف ريسطو و كفاش تغاوتات معاه أسيل و رجعات مريضة للخدمة و البوليس سرسبات ليها كلشي عاد سكتت بهية : اوعدى على مسخوط هادشي كامل عملو...بلحق بلاتي على والديه حتا نشبرو .. أسيل:مهم اما اخر مرة نلقاه كيضور بنا ...بارح بزز باش فكيناه«ضحكت ضحكة خفيفة و شافت ف ريم»أما كانت توصللكم خبارو فالحبس.... بهية: اوعدي يانا...«شافت فريم »: سمحلي يا بنتي انا ميسحابليشي غيعمل هايدا انا قتلو يبقى موراكم غير من خوفي عليكم «شافت فاسيل مطولة و هضرات بحينية»: اسيل تبع دوا ديالك اماما ديالي متفرطشي فصحتك .. اسيل: ماما صافي متخفشي عليا...انا مبقيتشي ستيتوة(صغيرة) أسيل«تفكرات خوها جود»: اماا جود لباس عليه؟ غدا نصردلك فلوس شريلو ديكشي كامل لي بغا ماتخليه مخصوص من والو بهية :واخا ا بنتي الله يرضي عليك ..ماخصو والو لباس عليه الله يرضي عليك كملو الهضرة وناضت كل وحدة بلاصتها ..أسيل شعلات تيليفون وصلها مساج من عند أديب عطاها ماتخدمش ربعيام حمدات الله ماجراش عليها ..قراتو وطفات تيليفون ونعسات.. طنجة مرشان حاط رجليه على طبلة مسرحهم و كيبخ في دخان ويتنشوا على كاس ديال أتاي أمينة حادرة راسها على الخدمة كاتعمي عينيها..مرة مرة يلوح ليها شي كلمة حتى عافت ديك الݣلسة لي ݣالس حداها .. لمكي:دابا تينا باقي ماتسالي ديك الخدمة لي في يدك أمينة«علات عينيها فيه مخنزرة»:باقا معطلة فيها وفلوسا عاملين طريق وعندي مانقضي بيهم لمكي«جمع رجليه و تقاد في الݣلسة»:اسمعني اج•يفة فلوس تشبرم تحطملي فوق طبلة وقولي ماعلمتكشي يلا بردو عليك العطمين ديالك انا نسخنملك أمينة:حشومة عليك امكي عيني حفيتم على هاد صنعة وعمري فرحت بفلوسا هادشي لي كتعمل مايبغيه لا ربي لا عبدو ياله بغا يجاوبها وهو يسمع لباب كايدق حصل واقف جر رجليه كايعرج بيها غير حل لباب وهو يفرنس حتى بانو سنانو..شرع الباب على حدو لمكي«عينيه على ساشيات لي هاز»:اهلا اهلا ولد مداني مسا الخير كيف تينا خالد:ياكما صدعتكم «سرح عينو لداخل بانت ليه أمينة»:خالتي أمينة كيف تينا لباس كولشي بيخير أمينة«عوجات فمها»:مسينا على الله..كنت لباس حتى شفت كمارتك خالد:مقبولة منك انسيبتي الله اودي لي جا من عندك سمن و عسل لمكي:زيد دخل زيد حيد مبرد خالد:لاء غانمشي شبر السخرة لوصيتيني..وماتنساشي ديكشي لي وصيتك عليه لمكي«شد من عندو سخرة ترمتو كاتشطح بي الفرحة»:كون هاني ابا خالد.. جر رجليه داخل و سد لباب حط ساشيات فوق طبلة جبد منها جوج قرعات ديال ماء الحياة (الماحيا)دخل لكوزينة هز كاس و رجع لبلاصتو..أمينة كاطلع فيه وتهبط القلب ديالها غايسكت غير بالفقصة ديالو هزات ديك الخدمة لي كانت كاطرز فيها وناضت .. أمينة:هاد كـ*افر بالله مايبقاشي يعتب الدار ديالي قلتا لك وعاودت لمكي:ديها فراسك ماشي شغلك فيه..ونقص من ديك الهضرة ناقصة ديالك معاه هاودني منك «شافها غادا»:فاين ماشا أمينة:طالعة نفوقي مابقالي منگلس هنايا...طلعتيلي السكر لمكي:ومشي وضربا بنعسة عاوتاني..الله يعميها لك هاد الليلة أميمة«تمات غادا وهي دفل حدا رجليها»:تفو الله يطيرك عليا يا عيفت رجال.. شماتة لمكي:واقوول لي بغيتي دبا... نعوط مجاج ونتفاهمو ديك ساعة مشي عور عينك راك غزالة وكتزيد تكمل حركات راسها بلا حولة وطلعات قاصدة دروج عينيها مغرغرين وقلبها غايطرطق غير مدرقة شمس بالغربال..دخلات لبيتها وسدات عليها بساروت عارفاه غايعمرها شراب ويجي يدق عليها وللخر ديالو يجيب لكاو حدا لباب حتى يصبح الحال ودوزها باش عطا الله. أصبحنا وأصبح الملك لله 🌄 الجو صافي وريحت البحر وريح خفيفة بين دروبة والحومات..فدار بهية لي من دخلة ديال لباب تشم ريحت نقا وشقا لباب مشطب ومرشوش بالما ودار مجفة ومطرفة صالونات مجبدين وريحت العود فايحة في دار..على طبلة منزلة الفطور على حقو وطريقو وبتاويل تشها تݣلس تفطر فداك الجو لي دايراه هي و ولدها حاطة قدامها طاس ديال القهوة معطرة بالحليب ريحتها تحل النفس.. بهية:فطر العزيز ونوض باش تمشي تقرا را غايمشي عليك لحال جود:باقي الحال أمـا غي خليني نفطر فخاطري دابا يجي مورايا سعيد يوصلني بموطور بهية:ماناويشي تبعدلي من ديك كمارة دنحس وكبير منك باقي شي نهار يطيحك فشي مصيبة..خليني هانية متفقصنيشي جود«ماعجبوش الحال»:صافي اما شبعت..هايانا ماشي بوحدي غي رتاح بهية:جيبلي معاك تيليفون ديالي هوا فوق ڤيترينا وعاد مشي جر رجليه هز شكارتو دارها على ضهرو و داز لڤيترينا جبد منها تيليفون وداه ليها عاد خرج..غير سد الباب وهو يبان ليه صاحبو كايتسناه مشا عندو كايزرب في الخطوات جود:ياله وصلني نمدراسة دغيا لا شافتني الوليدة معاك غاتعطيني شي قتلة سعيد:طلع طلع..ملي تينا كايعجبوك مواطر قول نختك تشريلك واحد..شي نهار غاتخرج عليا مع بهية هي ماكاتحملنيشي وغاتزيد تكمل جود:وشحااال فيك دالهضرة ا صحبيي زيد قدامي زيد... عند بهية العشرة ماشي بالسنين ولا بالخبز والملح ولا العشرة ديال يومين العشرة ديال بصح هي الوقفة ديال رجال لي مايتغيرو يطول زمان ولا يقصار..هذا حال بهية مع راجلها واخا بعدات المسافة بيناتهم بقات العشرة معلقين في بعضياتهم وعمرها هانت عليهم سنين لي دوزو بزوج..كاتشرب قهيوتها وكاتهضر مع زمانها وضو عويناتها بهية: الحبيب ديالي شفتك ضعافتي مابقيتشي كاتاكل مزيان ياك ؟! حاميد: كاناكل علاياش قديت وصافي..كيف تينا لباس ؟جود مشا يقرا ؟ بهية«حركات راسها»:مشا عاد دابا.. حاميد:ايوا مزيان..أسيل ماهضرتشي معاها بارح عندك شي خبار على فاين ݣالسة واش مرتاحة بهية:العزيز ديالي ماتهزشي الهم لباس عليها..ماتفكرشي فينا ديها غي فصحتك وخدم بشويش عليك حاميد:الله يرضي عليك ا بهية..غي ملي تهضر معاها وصيها ترد لبال نراسها هي برانية وعاد صحتا على قد الحال بهية: كون هاني كانوصيها احاميد..شفتك دبا تينا كاتسقسي غي على أسيل و جود فاين نسيتني انا حاميد«ضحك»:واتينا هي نوارة و لعمارة دقلبي و داري كون مانتينا كون حماقت شحاال هدي بهية«حناكها تزنݣو»:الله يخليك ليلي ياربي..ياله الحبيب ديالي انا غانوض نجمع ونخرج نتمشا شويش وندوز نشوف أمينة حاميد:واخا مشي وتهلالي فراسك..يلا خصك شي حاجة علمني.. حركات ليه راسها وختمات هضرتها معاه بابتسامة تفتح ليه نفس عاد قطعات..وكيف كايقولو العشرة هي ثبات في المحبة وثقتك في اهلك وناسك بلا مايجيك فيهم حتى شوية ديال ظن و شك جيهتهم..ناضت جمعات داك الفطور ودازت لبيتها لبسات جلابتها وجمعات شعرها لي مزين بزغيبات شايبين لاحت على راسها زيف وهزات بزطامها وسوارتها وخرجات مخلية موراها غير طاقة الاجابية .. Casablanca بعد مرور أسبوع من بعد المرضة ديال أسيل رتاحت ليها شوية مور ماعطاها أديب ربعيام باش ترتاح.. لقات اينيرجي زوينة ملي رجعات كلشي سول عليها لمدة قصيرة قدرات دير بلاصتها مع لبنات و مع لكليان..دوزات نهار كامل في الخدمة وفينما كاتلقا الفرصة كاتهز عينيها لبيرو ديال أديب كثر من ساعة وهو مع شي وحدة في لبيرو لي ماعرفاتهاش ..بدا الفضول كايدير خدمتو معاها عيات تقلب على شي سبة باش تعرف شكون هادي لي معاه والو بقا ليها حل واحد هو تاخد رأي ديال ريم واخا عارفة غاطيح في يديها وتبقا تهزها بأديب وتحطها بأديب ولكن زعمت حيت فضولها دارها ليها..جرات رجليها لبيرو ديال ريم لقاتها خدامة .. أسيل:ريم! زااين ديالي ريم:طلق دكشي لي عندك وغبر عليا وجهك يانا عارفاك علاياش كتنبش مصباح أسيل«تحمست»:صراحة ولكن والله ماكاين ديكشي لفبالك تينا غي جاني فضول وصافي ريم«هزات عينيها فيها مضيقاهم فيها»:شني تما علاش جاك فضول ياله غاتجاوبها حتى قاطعاتهم وحدة من الموضفات هازة شي وراق في يديها .. لبنت:نتي هنا كنت كانقلب عليك أسيل: غي كنت كانهضر مع ريم...بغيتي شي حاجة؟ لبنت«مدات ليها لوراق»:هادو ديال مسيو ناصر عاودتهم ليه حيت وقع فيهم تغير ديهم لسي أديب يكاشيهم نتي لي تكلفتي بالبيع..بغيت نعطيهم لحفصة مالقيتهاش أسيل[تحمسات]:اه دابا اختي ..انا نطلعملو ماعرفتش كيفاش شدات من عندها لوراق وطلعات وفعلا مالقاتش حفصة ولكن تيليفونها وصاكها فوق لبيرو ..زعمت وجرت رجليها بستريس لي شدها دقات دقة خفيفة لدرجة سمعاتها غير هي وحلات لباب أول نظرة تسرحات ليها في لبنت لي ݣالسة منخوية بكسيوة ديال لقطن لاصقة مع ليبوط في الكحل شعر مسرسب اما ماكياجها حكاية..بقات ساهية مدة قصيرة لي خطفات فيها شوفة حتى نتابهت ليه هو لي معلي فيها حاجبو.. أديب:كاندقو عاد كاندخلو أسيل«بلعات ريقها»:سي أديب دقيت عاد دخلت أديب«شاف في الوراق»:شنو تما!؟ أسيل«دخلات وسدات لباب»:غير شي وراق خصك توقع عليهم د موسيو ناصر C'est tous... أديب«حرك ليها يديه باش تجيبهم»:حفصة فين هي؟ أسيل«بقات كاضور في عينيها»:ماعرفتشي بغيت نعطيهملا مالقيتهاشي«عاقت براسها غاتكحلها على البنت»:احم..يمكن مشات ن toilet هزات عينيها في البنت كاتشوف فيها وديك البنت هازة تيليفونها كاتخربق فيه مامسوقاش ليهم ..وقع داك لوراق وعطاهم ليها لقاها حالة فمها أديب:هاكي وكلمي ليا حفصة معاك ..كل واحد يديها في خدمتو يلا مالقيتيهاش حطيهم ليها في لبيرو حتى تجي أسيل«لعنات راسها ألف مرة على لفضول لي وصلها لعندو»:واخا اسي أديب.. خداتهم وخرجات كاتململ فداك طرف تبع ليها لعين حتى خرجات .. جنات:حشومة عليك لبنت شوية وضربها بدوك لوراق ..من نيتك اأديب! أديب:عفاك بلا مادخلي معايا فهاد تفاصيل عادي نبهتها وصافي جنات:راني كانعرف داك تنبيهات ديالك ويلي غاتوريني فيك انا حافضاك أديب«هضر مبدل الموضوع»:غايجي سلطان موراك؟ جنات:اه شوية ويجي ..انا غير جيت نشوف واحد سيدة حداكم هنا ودزت نشوفك أديب:مرحبا بيك اختي جنات ..كلشي ديالك جنات:زعمة كادير معايا صواب ..اسيدي الله يبارك فيك عند أسيل مور ماخرجات لقات حفصة في بلاصتها غير شافتها حفصة شهقت ... حفصة:اويلي نتي منين خرجتي أسيل«كاتعض شفاشفها»:ختي سمحلي شي وراق كان خصم يتسيناو ودخلتهم في موطعك ..غي سمحلي حفصة«وقفات قافزة»:اويلي اش درتي ..اش ݣلتي ليه أسيل«ولات غير كاضور في عينيها»:قلتلو ماكيناشي..زعمة قلتلو طواليط دخلات..قالي نقولك دخل عندو حفصة«عرفاتها خلاتها على جدها»:قادي غا فمك لي مراجل بعدا عارفة سعدي ناقص ليوم يغسلني أسيل«باغا تبرد عليها»:ماتخافشي شوف انا شحال من مرة صبني ماشي غي غسلني ومعمل والو ..دخل وكون هانيا حركات راسها ودازتها ودخلات وهي هبطات حاسبة دروج دارتها قد راسها كاتكون هانيا وكاتنوض تقلب على صداع راس بوحدها ..كل واحد وباش مبلي وكاين لي مبلي بالفضول ..دخلات عند ريم لقاتها مبدلة حويج الخدمة هازة صاكها غاتخرج .. أسيل:فاين بسلامة ريم:اختي غانمشي نعمل واحد زيارة خفيفة ضريفة لشاف أسيل:هذاك لي نفوقي شنو رأيو فهاد الخرجة قبل الوقت ريم:ماغايقول والو كملت الخدمة ديالي وأصلا شويش غاتخرجو ...ضرق عليا تينا ..ماعندو ماين يعرف أسيل:واخا مشي أنا نشوف مع بنات يغطيو عليك..نتينا لي جات معاك ا موكة ريم زادت علاقتها اكثر بجلال ويمكن حيدات خوفها منو وعطات فرصة لراسها معاه و تكون معاه براحتها...هاد المرة هي لي مشات لعندو فين خدام ..ناس كاتدخل لكوميسيرية ولا الولاية مخلوعين هي داخلة مقادة كاتفرنس ماخصها خير مولات شي داخلة كاتململ ضاربة تيشورت بيض قصير مع سروال جينز اوفر سايز طالقة شعرها ..غير وصلات لمكتب العميد حبسها شرطي لي في لباب .. ريم:سمحلي ممكن تقولو ريم .. شرطي:سمحيلي عندو شي حد دابا يسالي و نشوف ليك تفضلي جلسي .. هزات فيه حاجبها مخنزة ومشات تحط مسعودتها ترتاح بقات شي نص ساعة وهي كاتسنا حتى تعصبت ناضت تهضر مع لبوليسي حتى شافت لباب تحل ..ضربات مها صدمة وهي كاطلع وتهبط طلعاتها من صبع رجلها صغير حتى لراسها..اش منك يا تقززاب واش منك يا صدر واش منك يا ترامي اسي تهامي واخا ضعيفة لمسائل عندها مقادة و المعري كثر من لمغطي ..بدات لغيرة كاتخدم عليها غير بان ليها جاي موراها وهي كطرطق فيه عينيها ماعرف راسو باش تبلى.. جلال«عارفها شنو غاتكون فكرات»:ريم!! من فوقاش ونتي هنا!؟... ريم«مزال كاطلع وتهبط فختنا و كاتعبرها من جميع الجوانب»:المهم هو جيت «غمزاتو»: كنتي مشغول اسي جلال ولا... جلال«شاف ف غيثة»: صافي ا غيثة كوني هانيا لوراق ديالك في الحفظ و صون .. غيثة«طلعات وهبطات في ريم قربات سلمات عليه بلابيز»:شكرا جلال والله ساعدتيني .. جلال: تيسري نتي دابا...«شاف ف ريم»: ريم دخلي.. ريم«دخلات ماحاملاش الموقف»: شكون هادي !؟.. جلال:ريحي بعدا «قرب يسلم عليها بعدات وجها»: مال ݣنسك .. ريم:شكووون ديك خيتي لي خرجت من عندك !؟ جلال«جرها تݣلس وݣلس حداها »: بنت خالي...بغات تخدم شي وراق قانونيين وعاونتها.. ريم«علات حاجبها فيه»:بنت خالك!! وعلاش مدليلا حناكك..وكاينة شي وحدة كتجي تخدم الوراق بديك لحالة .. جلال[زفر ]:دابا أنا مالي ومال حالتها خليني ا ريم مهدن الله يرضي عليك .. ريم«حمرات عينيها فيه»:دابا أنا كنعصبك !؟ ݣالس معاها بديك لحالة و مانع شي واحد يدخل شني بغيتيني نفكر مثلا .. جلال«كايحاول مايتعصبش عليها»:رييم هضرت معاك ..بنت خالي عاونتها ماتبقايش تخايلي شي حوايج ماكاينينش .. ريم«ناضت هزات صاكها قاصدة لباب حتى جرها من دراعها»: طلق مني نمشي فحالي نستاهل انا لي مجا نعندك نشوفك ..حتى كاتخرجلي وحدة لابسا مترو دالتوب كلشي فيها مفضوح وساعة ونتنا معاها نداخل .. جلال«عقدهم فيها »:ديري عقلك من تبرهيش«قربها عندو»:عيني عمرات الشمالية غير تهناي بقات كادبل فعينيها وهو كايشوف فيها حتى سمع لباب دق ودخل لبوليسي لي في لباب شرطي:شااف..تحياتي..سيادة وكيل الملك طالبك جلال:واخا انا جاي «شاف في ريم »:بقاي هنا حتى نجي ريم[عاقدة غوباشتها]:واخا غي مشي هز تيليفونو وجر رجليه خارج خلاها في المكتب ديالو كاضور وتمنظر..علات عينيها على صورة ديال الملك كبيرة مور المكتب زعمت وهي تݣلس على كرسيه كاتبونبا عاجبها الحال حتى بانت ليها صورتو بلباس ديال الخدمة لي عمرها شافتو بيه بالݣرايد ديالو كانت صورة مع مو معنقها بلا ماتحس بتاسمات وعجباتها صورة أكثر حاجة هي لبسة كيفاش جاتو حمقاتها..حطات صورة بلاصتها وهي ضور عينيها جنب لبيسي بان ليها لفردي..عينيها شعلو تخاف ما تحشم هزاتو كاتبلع في ريقها كاتشوف فيه واش بصح فردي ولا غير لعبة عمرها تخايلات تشوف فردي حقيقي كانت كاتشوفو في الأفلام..هزاتو كاتقلب فيه بين يديها جاها تقيل كاتفكر كيفاش كايقدرو يستعملوه مع غاتحطو من يديها حتى بان ليها داخل مع لباب بعجاجتو وسد داك لباب حتى كان غايطيرو من بلاصتو..كاتشوف غير عينيه لي حمرين وتخنزيرتو فيها خلاتها تشهق وتنوض من بلاصتها مخلوعة .. تزاد معاها زايد ملي شافت وجهو فديك لحالة مخنزر فيها غايطيرها حتى شكات واش تكون دارت شي حاجة غلط .. جلال«غوت عليها»:ااااش كااااااديري ريم«قفزت»:و...والو غي كنت كانشـ... جلال«مخلاهاش تكمل هضرتها نتر ليها لفردي من يديها حتى توعتات»:ااااخر مرة تقيصي شي حاجة بعيييدة عللللك ريم«تحجرو دموع في عينيها»:شنو عملت مافهمتشي جلال«عينيه حمرين»:الفردي مااااشي دياااال اللعب ومااااتهزيهش بلااااا اذن ريم«ماقدراتش تصبر هزات صاكها قاصدة لباب»:انا هزيتو وتينا دخلتي ماكاين لاش هاد لغوات كامل جلال«هز راسو لفوق كايسوط»:دوزي تݣلسي ماغاتمشي لحتى لبلاصة ريم«واحلة فيها الغصة»:غنمشي فحالي.. جلال«هز سوارتو وتيليفونو ودار فرديه في سمطة منرفز »:باغا تمشي! تحركي أنا غانوصلك .. تحركات جيهت لباب وهو موراها عارف ماكانش خاصو يغوت عليها في لحظة ماكونطرولاش راسو..وصلو لطوموبيل وهي عاقدة غوباشتها وعينيها مغرغرين جاتها بحال داك لوليد صغير لي كاتاخد ليه شي حاجة هزها و كاتغوت عليه هكاك حسات هي ..طلعت دارت سمطة وربعت ايديها كاتشوف في زاج..عكسو هو لي هبط زاج وجبد ݣارو شعلو كايكمي ماعجبوش الوضع..مدة وهما ساكتين حتى كمل ݣاروه عاد قلع بطوموبيل .. ريم«كاتشوف قدامها»:علاش غوتي عليا ما عملت والو جلال«عينو على طريق»:يلا عاودت شفتك حاطة يدك عليه ولا غير عينك مشات ليه غانعاود نغوت عليك وكثر ريم«خرجت عبنيها»:واش من نيتك و غي جاني عليه فضول نشوفو كيف عامل جلال«عرفها ماغاتفهموش فضل يبدل معاها الجو ديال الهضرة»:نرضي فضولك ! ولكن راه صعيب عليك شوية تقيل باش تهزيه «شاف فيها»:خصك جهدو ريم «فهمت وما فهمت»:الله يمسخك ا جلال..انا لي حمارة كانهضر من نيتي وتينا كتفلا عليا..انا ملي شفتو جاني فضول نهزو.. جلال«غمزها»:هاد ساعة نتي لي نيتك عوجة انا قلت ليك لفردي تقيل عليك تهزيه «بسفالة»: فردي لمخززن واااازن الشمالية ضربة وحدة ومانزيدش... ريم«وجها ولا حمر شنو لي وازن ماعرفتو كايهضر على لفردي ولا حاجة اخرا»: الله يعطيني لعافية نهاد دقم (لفم) ..كيجبد عليا غي النحل .. جلال«بتاسم بجنب مركز في طريق»: نيتك ناقصة الشمالية... بانت بتسامة على شفايفها حركات راسها بلا حولة ورجعات كاتشوف في طريق..شكون ݣال حتى هو غايرجع ينوض يحب شي نهار عاطيها غير لسواوي وتقرقيب سطالي من لخدمة لبار لدار شادها روتين حتى جاتو و دخلات كوزات فݣلبو ..ملي شافها ضحكات عاد رتاح واخا تعصب حاول يبدل معاها الموقف لي وقع بدون وعي منو..ركز مع طريق وهي رجعات المود لي كانت فيه واخا مافهماتش علاش غوت عليها بانسبة ليها بدون سبب وبالنسبة ليه شلا مايكون البروج بني مسكين إقليم سطات لليل تجبد وزاد في ضلام غير ضو القمرة لي كايبين الغاشي..نضورو ونتساراو بين الفيرمات والفدانات بين لكوارا وبين زريبات ..ندوزو على المطمورة والبير وندخلو القاع الخيمة الكبيرة فيها كبرو صبيان و بنات وفيها تزوجو..ترباو بين لعمام والخوال وعلى جماعة ولفو..تعلمو يحتارمو لكبير قبل صغير وصوتهم مايترفع قدام كبيرهم يلا كان حاضر ..عيالات لوايس بيناتهم لابد من الغيار وسـ*م كايقولو مرت للوس ولا ضربة بالموس ..مجموعين في الخيمة (دار)..والخيمة كبيرة صوارها عالين ومولاها الله يجدد عليه رحمات خلاها لولادو يكونو هما راي وهما شوار والأهم يبقاو مجموعين.. كلشي كايدير ليهم حساب ولي في دواو ولفيلاج كايݣولو فيرما "الحاج السماعلي" و"ولدو"...بعيد على دار لكبيرة كاينة فيرما خير مولانا فيها شلا أراضي ضايرين بيها وشلا كوارا بقر وغنم وماعز.. ليل مسرح وضلام ليل زايد نغزة فدار الحاج السماعلي الله يرحمو كايتسمع غير صوت دقان مجهد وماكايبشرش بالخير كثر لعياط والغوات حتى ناضت قافزة من بلاصتها مشعلة الڤيوز حدا راسها... دامية«كاتحرك فيه»:مجييد..وااا مجييد..نوض شوف شكون كايفرع لباب لاكون ولد لبراهمي هذا كايعيط مجيد«ناض مخلوع»:اااش كاين تاني ..ياااربي سلامة دامية«بخوف»:وااانوض شوف لعياط كثر ناض كايعتر لابس دراعية لبس في رجليه وخرج كايحسب درووج حتى تلاقا مع خوه حتى هو نازل..نزلو حلو لباب بدهشة.. مجيد:اش جابك اولد لبراهمي فهاد ليل.. لبراهمي«كاينهج»:عـ...تــ...عتق..اسي مجيد..«بلع ريقو»:لبلاد ديال و...ولد خوك.... مجيد«وجهو صفار»:واااااادعاوي لبلا هضر اش كااااين دغيا لبراهمي: ناادر لي فجيهة القبلية ديال ولد خوك اسي مجيد مشا تݣدا.. مجيد«فشلو عليه رجليه»:تا اش ساير تݣول اوجه نحس ..كي وجهك كي خباراتك الله يتبعك لبلا«شاف في مرتو»:طلعي جيبي ليا جلابتي دغيا.. عزوز:كايضهر ليا نعلمو مولاها ا مجيد .. مجيد«حط صبعو على فمو»:سكت وقطع الحس حتى نفكو هاد الحريرة .. جابت ليه جلابة لبسها دغيا وخرج هو وعزوز خوه تابعين لبراهمي لي خدام عندهم وجاب ليهم لخبار..جيهت لأرض ديال"ولد" خوهم كايبان ليهم غير نار شاعلة ولحالح ديالها في سما..ماشي پالة ولا جوج ديال تبن..نادر على قدو شاد مساحة كبيرة في لأرض عليه واقفة لفيرمة ومنها كايعلفو كسبهم..تجوقت دنيا خرجو كبير وصغير..العافية شادة في صح ومايقد يطفيها حد ..عيطو لبومبية ماجاوبهم حد بقاو كايتحصرو على داك الخير حتى كلاتو العافية ..ضو ديال الفجر بان ولأذان في صوامع علا صوتو .. عزوز:عايش خويا نوض نمشيو سْمر (البرد) علك مجيد«دموع على عينيه»:عاخليني نتحسر على رزق ولد خويا لي مشا..«بغصة»:مقصودة اولد بويا مقصودة.. عزوز:الله يهديك الحاج نعل شيطان لي وقع وقع دابا عانوض..نشوفو اش نديرو نعيطو ولا نݣلسو مجيد:مااانݣد نݣولها ليه مانݣد .. عزوز«كايسايس معاه»:واخا غانوض ويكون خير زيدو قدامو ماݣادش يخلف الصدمة غالبة عليه هاز جلايلو وعقلو غير مع ولد خوه وكيف يكون حالهم من بعد هاد المصيـ بة لي طاحت عليهم .. لعافية طفات والكية والفقصة ديال رزق بقات في حلق الحاج مجيد دخل لدار مهدود وخاطرو مغير ..حتى لاقاتو مراتو في لباب حروفها زينين واخا كبيرة وعمرها فوق ربعين ولكن ماخدا منها العمر والو مازال مجبدة محزمة على كرشها بفواطة ديال لكوزينة وجامعة راسها بزيف ومن ريحت القهوة لي عاطية باينة كانت كاتوجد الفطور ... دامية«دمعة في طرف عينيها»:الحاج! الله يعوضكم بقيت هنا كي راس لمگطوع مجيد«ݣلس على لفوطوي في دخلة ديال دار»:مكتاب الله ماعندنا مانديرو ..الحمد لله ماكان حد تما جات في لمال وماجاتش في نفوس دامية«طبطبات على كتفو»:الحمد لله الحاج..عيطتي لولدي جلال؟ مجيد«حرك راسو»:لا ..ݣلت لعزوز يعلمو انا مانݣد نݣولها..لݣطارات لي حصدهم دارهم نادر باش يعلف كسبو من غلت أرضو[حنا راسو باسف] ..ولكن قدر الله ماعندنا مانديرو دامية«حطات يديها على حنكها»:وماعرفتوش كيفاش شعلت العافية؟ مجيد:غابر لأثر لشي حاجة ..قلبو لعزارة مالقاو والو كايݣولو لاكون شي حد كان كايكمي تما ولعلم لله دامية«بشك»:ديك العافية ماهي ديال لݣارو الحاج ..الله يسترنا من لي جاي مجيد«سكت شوية كايفكر وناض»: أنا غانوض نصلي صبح والله يدير الخير..ديري شوية يطلع نهار وضّوري تيليفون لزهور شوفي حالها دامية:واخا عاكون هاني الحاج شوية نضّور ليها جر رجليه طالع في دروج وخلاها دخلات لكوزينة لقات مرت لوسها سميرة وهي الكبيرة في العريسات ديال الحاج السماعلي ..واقفة كاتخبز لملوي وتعمر أتاي مرا مقدودة في العمر فايتا الخمسين ولكن وجها ماباينش فيه عمرها.. دامية:سميرة!! شفت حسك مݣطوع هاد صبح ماسولتي على العافية لي ݣدات سميرة«طفات البوطة وشافت فيها مطلعة شوكتها»:ماعندي مانݣجدر بالخبارات لملاوطة بحال مولاها خليني نوجد فطوري لاتصدعي ليا راسي بهاد الهضرة..نهضر ولا نݣجدر دامية«طلعاتها وهبطاتها»:سولناك طليتينا على صباح ..طفي معاك على القهوة وحطي الفطور شوي ينوضو ولادك خاصهم غامايطحنو خرجات من عندها مخلياها كاتبرݣم في الكوزينة وطلعات تشوف راجلها وخلاتها منها لسـ*مها ولي فيه شي سـ*م يموت بيه خلاها مولاها الواد صافي وفيه نقى عوم وشقى تلحق تلقى وقدرك مع ناس وبينهم يبقى...وثاني واد لخداع شّرو كايلمع ومن غدرو تشبع وتقنع..ولفعة في دار الحاج السماعلي تربات ... `.trim(); const cleanText = text.replace(/\s+/g, " ").trim(); const contentElement = document.getElementById("content"); const loadMoreContainer = document.getElementById("loadMoreContainer"); const chunkSize = 4000; let currentIndex = 0; if (window.location.hostname === "www.9isasichk.com") { function loadNextChunk() { if (currentIndex >= cleanText.length) { document.querySelector('.load-more-text').innerText = "نهاية البارت"; return; } const nextChunk = cleanText.slice(currentIndex, currentIndex + chunkSize); contentElement.innerHTML = nextChunk; window.scrollTo({ top: 0, behavior: "smooth" }); currentIndex += chunkSize; if (currentIndex >= cleanText.length) { document.querySelector('.load-more-text').innerText = "نهاية البارت"; } } loadMoreContainer.style.display = "block"; loadMoreContainer.addEventListener("click", loadNextChunk); loadNextChunk(); } else { contentElement.innerHTML = cleanText; }
