فجيهة لوخرا..
خارجة مع لباب وساكها فيديها لابسة عباية وكتمضغ فالمسكة وطرطقها مرة مرة…وكتشوف فالطريق وفلس غادي ولي جاي وفالطموبيلات
توفيق ديمارا الطموبيل وتبعها. بالشوية كلاكسونة عليها مادارتش ..زاد فالسرعة شوية تا تقاد معاها ونزل الزاج ونطق :واحد الدقيقة عفاك
شافيت فيه وقوصات حواجبها بلا ماتجاوب ورجعات لطريقها
الشيفور:حشومة عليك نيتي حسنة قلت لك غير دقيقة
تنهدات بصوت مرتافع ونطقات:شنو باغي اخويا
سمع صوت هارون فلكيت لي تقاد فلجلسة كيسوط الدخان:حبس الطموبيل ونزل عندها..
داك الساع حبس الطموبيل ونزل هي بغات تكمل طريقها وهو يوقفها:تستاي مالك زربانة
رجعات اللور كتشوف فيه الطولة والتجريدة ولباسو باينة غالي ريحة لباعفان سابقاه ومبوكص..طموبيل ميرسيديس اخر ماكاين نطقات بنفاد صبر:اش بغيتي
قرب لعندها وبمراوغة:شفتك فالطبيب وبقيت نتسناك بلا مانطول نجيك نيشان عجبتيني وبغيت نتعرف عليك كتر..نجلسو ونهضرو ماموالفش نتبع شي وحدة ماشي من عوايدي ولكن نتي عجبتيني ودخلتي لخاطري
طولات فيه الشوفة
وهو تبسم:تفضلي نوصلك وفالطريق نشربو قهوة ونتفاهمو على لباقي ولي بغيتيها انا معاك
رجعات اللور ونطقات بحدة:اتركب فخرشاشتك واتوكل على الله وسير شوف لك شي وحدة غيري ركبها قدامك وشدو طريق لوطوروت لابغيتو ماشي غا قهوة..بنادم كي داير
توفيق مافقدش الامل:كيف قلت لك نيتي حسنة ناوي معاك المعقول لا تفاهمنا مافيها باس نجلسً ونهضرو فشي ريسطو كالم نديو ونجيبو فلهضرة وايلا تافقنا نتوكلو على الله مافيها والو راني ولد الناس
طلعاتو ونزلاتو وهي كتمدغ فداك المسكة وهو متبسم ونطقات كطرطق فالمسكة:ماباين عليك لا معقول لا ولد الناس..لي ناوي لمعقول ماكايجلس فلقهاوي يتفاهم كيقصد الدار تماك كتكون المفاهمة الشريف…شنو بنت لك برهوشة اضحك عليا بجوج كلمات وبهاد شوية د الزين لي فيك انطلع نركب معاك وتحلسني فلقهوة طمعني بداك لعصير ولا طاكوس لي اتوكلني من بعد دير فيا مابغيتي…سير الله يرحم باك راه بحالك كترو كضحكو على بنات الناس من بعد تخليوهم يجيو كيتباكاو علينا ملي كتلوحوهم
بغات تمشي وهو يشدها من يديها:ماغانديش عليك راه قصدي شريف هاكي نمرتي عيطيلي ملي توصلي للدار ونهضرو غير بالعقل حتى تكسي بلامان داك الساع نتلاقاو
تنترات منو وخدات داك لكارط فيها نمرتو قطعتها ورماتها على وجهو:واش ماكاتفهمش تحرك من قدامي لا نجمع عليك الجوقة وشوف فين دير وجهك داك الساع
خلاتو غير كيشوف فيها شيرات عليه بساكها نيشان لصدرو:شنو مازال كتسنااا تحرااك الباشااااااار
وهزات تاني ساكها من الارض ونطقات بتحدير:قسما بالله وتزيد تبعني نوصل خويا للكوميسارية بتهمة التحرش نديك فين تتربا
ومشات بخطوات مزروبين مخلياه غير واقف وكيشوف لدرجة دار وشاف راسو فزاج الطموبيل واش هو هداك زعمة مبوكص اول مرة يوقع هدشي…
فجيهة لوخرا..ساط الدخان وهو كيسمع كاع لكلامهم……غمض عينيه مستمتع بالمعزوفة الاخييرة لي كتختم داك الموسيقى الكلاسيكية المفضلة عندو تا بدا كيتسمع صوت تصفيق الجمهور وطفا الموسيقى ورما البونتة من الشرجم ونطق:صافي سير بحالك
قطع ودوزو نمرا خرا ونطق:وحدة خدامة فرملية فصبيطار(..)كيقولولها عبلة متوكل بغيت يكون الضوصي ديالها عندي شكون هي ووفين ساكنة وشنو كيقولو عليها..كاع معلمواتها يكونو عندي الشادة والفادة سمعتني
وقطع..وهو كيديماري:الاختبار ربحتين..ندوزو لضوصي ديالك شنو فيه…
لاول مرة الفلم ديالو كان بنهاية مختالفة ..زعمة هاد عبلة اتصدق هاد المرة؟
نرجعو لقصر الزعيم..
رجع من الشركة لقاها فالصالة جالسة مانتابهاتش ليه كتهضر مع الطاهرة
عائشة:فقصنيي لبنت مافيها مايتعاب بعقلها ومرزنة ودابة عيطلي كيقولي ما ايديهاش
الطاهرة:دوزي تجلسي ماغانبزوش عليه شي وحدة ماباغيهاش خاص يدي وحدة باغيها اصلا ماسوقناش يختار لي بغة ماخاصنا مشاكيل من بعد
عائشة:عندك الصح ولكن..
قاطعها فاش حط يديه على خصرها وورك عليها تا غوتات مقربها ليه:ولكن ادخلي سوق. راسك وتخلي عليك هارون
بغات تبعد حشمات قدام الطاهرة:ودابة. رخي
زاد ورك وهو مامسوقش:ديري عقلك راك كبرتي بعدي منو
حمحمات:يوسف رخي مني ونضهرو
تقاد معاها فالو مازال محاوط خصرها:مالك
طاهرة:اشريف راني جالسة هنا لا ماشتينيش
يوسف شاف فالطاهرة:مرتي هدي قلبي على راجلك شوفيه فين هو
طاهرة:مازال مابغيتي تحشم
تبسم وهو كيشوف فعائشة:كلامي مفهوم
تنترات منو ومشات وجلسات حدا الطاهرة:مافيها باس نختار معاه لا عولنا عليه عمرو يتزوج
يوسف بجدية:عائشة ماخصنا صداع من بعد ..لي بغاها راه ايديها خرجي. راسك من هدشي
تنهدات:صافي واخة
وناضت عندو:فيك الجوع
يوسف:كليت
عائشة قوصات حواجبها:فين كليتي؟ماموالفالكش ..كتعشا فدار ماشي برا
يوسف كيمسح على خدودها:كان اجتماع تعشينا مجموعين
عائشة:هدشي جديد عليا وليتي تاكل فلاجتماعات..
خربق شعرها :المرة الجاية نديك معايا
عائشة:اي وا عنداك
طاهرة:وقت الدوة دناصر
طلعات للفوق
يوسف قربها ليه كتر:شنو لحسك مازال ماباغة ديري عقلك
تبسمات كتلعب فصدافات قميجتو:توحشتك ليوم
شاف يمين وشمال وهزها:زيدي نكملو لفوق ونشوفو قضية هاد توحشتك
بقات كضحك عاحبها لحال
خدات الدوة ديالو ومشات لورشة الرسم دخلات وقربات ليه وهي مبتاسمة كتشوفو شكا يرسم :الدوة ديالك
ميل راسو كيشوف فاللوحة:ناقصاها شي حاجة
طاهرة قربات ليه:الالوان اناصر
شاف فيها: زعمة؟
هزات راسها باه خدا منها الدوة شربو مع الدوة وخدا يديها باسها :الله يخليك ليا
تبسمات وهي كتشوفو كيدمج لالوان وبدا يوزعهم على اللوحة سكتات مراقباه تا سالة وشاف فيها:عندك الحق
طاهرة:شتي
تبسم:اي حاجة فحياتي عندك لمسة فيها وبلا داك اللمسة ديالك حياتي ناقصة
تبسمات:وانا ديما معاك
جرها ومشاو كلسو كيشوف فاللوحة من لبعيد كانت زوينة بزاف وفيها بزاف دلمعاني يدين متماسكين وضاير بيهم السواد ومن لفوق بحال السما كلها ملونة بحاليلا داك ليدين ايدخلو فداك السما
طاهرة:تاهي اتعلقها
هز راسو بلا كيشوف فداك اللوحة
طاهرة:وشغا دير بيها
ناصر:هدي اتكون لمرات هارون
شافت فيه:مرات هارون؟ واخة مازال ماتزوج ومازال مابانت
هز راسو باه:دابة تبان
تبسمات:سعداتها من دابة حسدتها على هاد اللوحة سيمانة ونت ترسم فيها
ناصر:كلي ديالك ماشي اللوحة..
سكت شحال وهي غير كتشوف فيه عارفاه كيفكر مابغاتش ديرونجيه
حتى كينطق:هاز الهم لمرات هارون خاص تكون صبارة
تنهدات:عندك الحق داكشي علاش مابغيتش عائشة تزيد تحكر عليه خاص هو لي يختارها مانبقاوش حنا فلعيب من بعد بحال كي وقع مع نارجس
هز راسو باه:خليوه يدي لي بغا
فجيهة خرا
كانت فالسطاح كتاكل الزريعة هي واحد صاحبتها كتعاود ليها:ولكن ولد القحـ حية بوكووص
صاحبتها:كون زعمتي مالك اش فيها ناوي ماوي لمعقول
عبلة:من نيتك داك النوع باينة فيه اش باغي كيقتلوك فلول بحلاوة لسان من بعد كياخد لي بغة ويلوحك كيدي لي كتختار المو ولا كيديها من مستواه ماغايديش وحدة ركبات معاه ولقاها ساهلة…بغاني ها دارنا
صاحبتها:بصاح عندك الحق بحال داك خونا لي شبعني وعود خاوية وانا تابعاه لي قالها كنديرها فتالي تزوج وحدة عمرو خرج معاها وخلاني كنتشوة
عبلة:دنيا هي هدي..
وشافت لتحت:شوفي ها لعريس جا ناري شحال غزال
كان عرس بنت دربهم دايرين خزانة فالدرب وهوما كيتفرجو من السطاح
صاحبتها:داتو لاباس عليه دارت لعرس فالدرب غا باش تفقصنا وتفقص بنات لحومة
عبلة:الله يعطينا شي راجل زوين وبفلوسو تا حنا
طلعات مها حياة لسطاح كطل تاهي:شتي لبنات لقادات دغية طيرات عريس بفلوسو ونتوما جلسو بايرات كطلو من سطوحة
عبلة:لعار امي قوليها زوينة ولا سكتي
حياة:مالي كدبت شوفو لعريس على مزيناتو شغا نقولكم الله يسكد ليكم الطريق مع شي ولد الناس لي يستاهلكم يكون بفلوسو وزوين
بجوج شافو فالسما وهزو كفوفهم:امييييييييين
غيتة من موراهم؛شكون ايقبل يهاد عزية باطوزة اخرتها تدي شي واحد بحالها عزي
عبلة:ماتشدونيش عليها
مشات كتجري موراها باغة تشدها
بعد مرور تلات أيام…
عائشة قطعات من الابل وجلسات تكمل فطورها
طاهرة:اش قالو داك التوام
(كتقصد عمران وفهد ولاد يوسف وعائشة سافرو فاكونص ليرى لبلاد)
عائشة:قالك ايجيو فهاد ليوماين
طاهرة:ايوا الله يجيبهم على خير
يوسف:ياك ما شي كارتة عاود دارو
عائشة:لا كلشي مزيان غير بغاو ندوز ليهم شي فلوس للكونط ديالهم
يوسف:معاودين لعام دلقراية ومشاو للمالديف يدوزو العطلة بحاليلا شدو بماستر
ناصر:يجيو وانقادو معاهم الامور
يوسف:ماشبهوش لخوتهم
عائشة:صافي ايوسف راه باقين صغار
يوسف:24عام صغار؟
عائشة:غيديرو عقلهم كون هاني عطاوني وتد باش ايقراو واينجحو
ميل راسو فيها بنضرة ديال كتحلمي
فبلاصة خرا..
جالس فالمكتب كيشوف الضوصي حتى كيصوني ليه الطليفون باسم كريم جاوب :شنو تما
كريم تحت واحد الكار كلو عرقان داك الكار خاص بالخدمة ودارو ليهم قنبولة نطق:قنبولة ..
هارون دار الهوط باغلور كيقرا فواحد المعطيات على واكد القضية:وصفها لي واينا نوع والسلوكة كي دايرين ولتداد فين وصل
كريم :راه فالخمسين
وبدا يوصف ليه القنبولك كيعطيه ليديطاي ديالها وهارون كيتصنت ومركز فهم المطلوب وعرف اينا نوع شك فواحد اللعيب:قطع السلك لزرق
كريم قطع السلك لزرق :مازال لعداد خدام
هارون:نوض غير خدعة
كريم ضرب فلارض وحيد داك القنبلة:باش يعطلونا
هارون:نوضي زرب على الوقت
وقطع وكمل خدمتو..داك الساع وصلو ميساج
قراه ونتض خرج ركب فاللوطو دمارا تا وصل لواحد لبلاصة وقف الطموبيل ونزل الزاج وشاف فيه بمعنى:شنو
مد ليه الميلف:هاو الضوصي كيف بغيتي تلتيام وانا تابعها كيف قلتي
حلو كيقرا معلوماتها والراجل كيدوي:البنت من الدار للخدمة من الخدمة للدار مرة وحدة خرجات مع صاحبتها غير يوحدهم كاع الحومة كيهضرو عليها مزيان عيالات ورجال ..وتا فالخدمة نفس الشي كلشي كيشكرها.من غير شي جيران قالولي انه شابعة مناتفة ولسانها متبري منها.عندها خوها بزناز ولكن كلشي كيقول عليه خصيم مامفاهمش مع باها حيت كيبيع لحشيش ساكن بوحدو عندو جوج ديور وطموبيل وموطور..وباها شوية صعيب عندو نيشان نيشان مقابل واحد الجامع راه هو لي بناه السي ناصر الزعيم عندها ختها صغر منها كتقرا فتاسعة دابة..ومها طيابة فالحمام كارياه..البنت داخلة سوق راسها كتخدم وتعاون واليديها ومحتارماهم.ولي جبدها كيلقاها واخة درويشة..احم المهم هدي الهضرة الدجيران وولي خدامين معاها فالصبيطار
هارون:ما داخلة فتاشي علاقة ..
شاف فيه؛ماكاينش شي واحد هاه ولا هاه
الراجل:لا اسي الزعيم ماكاين والو تخطبات مرة وسلاو ماتفاهموش.تلت سنين وهوما مخطوبين الاحترام بيناتهم.كيقولو تفكيرها كلو مع عائلتها..
هز راسو باه مازال كيشوف فداك الضوصي والراجل كل مرة يقولو كلمة عليها ملي كيتفكر شي حاجة
سد داك الضوصي :صافي
الراجل حنا راسو باحترام:شي حاجة خرا اسي الزعيم
هارون:صافي توكل
هاد الراجل ماكيفلت والو كيجيب كلشي صحيح هدي خدمتو
وديمارا راجع للدار …وصل لقصر الزعيم دخل ..كيشوف طاهرة جالسة فالصالة وعائشة يلاه نازلة من الدروج..تمشا لعندها وجرها من دراعها
عائشة:مالك
وصلها عند الطاهرة:فين ناصر والوليد
طاهرة:فالشركة
هز. راسو باه:غدا اتمشيو تخطبولي
عائشة خرجات فيه عينيها مامتيقاش وشافت فالطاهرة ورجعات شافت فيه وتبسمات:لعار واش كدوي بصاح
ماعندوش مع الصدمات دلعيالات مد ليهم العنوان:ها لعنوان.. ديو لي خاص تديو ..سميتها عبلة متوكل
وتم غادي وهي تجرو
عائشة:اويلي تسنا مالنا على هاد الزربة واش ما اتمشيش معانا ولا كيفاش وشكون هي ومنين عرفتيها
هارون:خدامة فرملية فواحد السبيطار كان عندي فيه شي خدمة..
طاهرة وقفات:وريهالنا نشوفوها
تنهد ها لي ماكايحملش:انا براسي ماشايفهاش
شهقو بجوج وهو تم غادي:عندي الخدمة هاد اليوماين ماغانكونش نرجع نلقاكم ريكلتو الامور ..تفاهمو على كلشي ولاكط يكون قريب وماعندي ماندير بالعرس..انشوفها نهار لاكط
عائشة تبعاتو كتجري للباب ووقفات ليه فالطريق:اتكايس علينا اناري…السلام عليكم بغينا بنتكم لاكط يكون قريب والعريس مشغول راه حشومة خاص تكون حاضر
شاف فيها ومسح على راسو:الوليدة فرعتي ليا راسي بالزواج ياك قلتي غير نعت ونتي تكلفي
وبعدها من طريقو خلاها غير واقفة
غوتات:خلي طليفونك شاعل لا بغينا نسولوك..اووف وكيفاش باغيها للزواج ونت ماشايفهاش
لقاتو ركب فالطموبيل وزاد تنهدات ودخلات اه عاجبها لحال حيت هو لي باغي يتزوج وحيت هو لي ختارها باش تهنا كتر ولكن ماشي بهاد الطريقة وبهاد الزربة تشوف الطاهرة شغا تقول
جلسات حداها:اش بان لك فهدشي
طاهرة كتقرا فداك العنوان وسهات لبعيد
عائشة:فين سرحتي معاك داوية
طاهرة شافت فيها ونطقات بهمس:العنوان
عائشة:مالو
طاهرة:هنا فين كنت ساكتة انا وختي ليلى هنا فين كنا عايشين مع محجوب راجل المي الله يرحمها نفس الدار نفس الحومة
غرغرو عينيها بالدموع من الدكريات لي جاو لبالها تنهدات بالم قاصحين دوك ليام ..دارت ليام ودازو سنين وسنين وغيكتاب ليها ترجع تدخل لداك الدار باش تخطب لحفيدها تنهدات فاش شدات ليها فيديها عائشة:لي فات مات وشوفي فين حنا دابة الحمد لله
طاهرة تبسمات وهي كتنهد:الحمد لله
فرانا الطموبيل قدام الشركة..
نزل وعطا سوارت للكارديان ودخل للداخل لي شافو كيعطيه التحية وهو كيهز غا راسو…كيتهامسو حيت قليل فين كيجي للشركة…الموضفات سهاو بالشوفة فيه كاينة لي اول مرة اتشوفو…كتر لقيل ولقال ..اما هو كان وصل لفوق للمكتب الخاص بناصر الزعيم…
دخل بلا دقان مولف معاه..لقاه عاطيه بالضهر كيطل على الشارع من لحيط كلو زاج…كيفكر حتى نطق:جيتي
هارون تبسم عرفو بلا مايدور:جيت الزعيم
ناصر ضار شاف فيه:اجي لهنا اجيي
قرب ليه وتحنا باس يدين
ناصر حط يديه على كتافو:الطبيب كيعيط باغيك دوز دير الفحص على راسك ومادزتيش
هارون مسح على راسو كان ناسي داك القرطاسة لي فراسو:ماعنديش الوقت الخدمة كتيرة
ناصر رجع اللور وجلس فوق لفوطوي:الخدمة ماتجيش قدام صحتك ..
هارون جلس مقابل معاه:صحتي بيخير
ناصر:ايوا هي لا زرتي الطبيب
هارون:ان شاء الله ..
ناصر:شنو تما
هارون رجع بجسمو اللور بابتسامة خفيفة زادتو رجولة ونطق:لقيت لك عروسة
ناصر بمزاح:خاص تسمعك الطاهرة
هارون مسح على راسو ضاحك:ليا ماشي ليك
ناصر تقاد فالجلسة:هي نجحات فالاختبار
هارون هز راسو باه:تماما كيف باغيها..ضوصيها نقي
ناصر:هضرتي معاها
هارون:مازال ماعنديش الوقت كيف قلت لك الخدمة كتيرة هاد ليوماين..الوليدة والمدام ديالك ايتكلفو غدا ايمشيو يريكلو معاها الامور ونهار لاكط ارا مانهضرو ونشوفها وتشوفني
ناصر ميل. راسو فيه:كتدوي على مراتك المستقبلية ولا على شي موضفة دافعة السي في تخدم عندك
هارون:لا راك عارفني كي داير ماعنديش مع التطوال وداك البدايات عزيز عليا ندخل نيشان فالموضوع
ناصر:هديك راه بنت الناس مازال ماكاتعرفك باش تفهم شخصيتك وتتقبل هدشي..مازال غريبة عليك هدشي لي كتقول دابة هي ماغاتفهموش حتى تعاشرك
هارون:كون هاني غادي نفهمها كلشي بطريقتي
ناصر ماكايبغيش يضغط عليه كتر كيبغي يخليه محافض على الهدوء ديالو:يا ميسر نشوفو دوك الجوج شنو ايديرو
شافوه داخل مع الباب وكيدوي فالطليفون نطق:قطعي راك بديتي تخرجي على الخط طلعي للسطر شوية…دماغي عامر ماعنديش فين نزيد هدشي ديالك
عائشة:وا المهم نت غير حاول تقنعو باش يجي تاهو معانا
يوسف بحدة :عائشة
سكتات ورجعات نطقات:صافي اسيدي نتوما لي كتعرفو ونتوما لي كتفهمو من صغركم لكبيرهم راضعين نفس لحليب دالسلطة والاوامر كتبغيو ديرو فيها راكم واعرين ومايقد عليكم حد ايوا هانت ها ولدك يلاه بسلامة
وقطعات عرفها غضبات تنهد وخشا الطليفون فجيبو وشاف فهارون:هدي ماشي بنادم هدي قنبولة
ومشا عمر كاس دار فيه التلج كتشعلو وتخليه كتجيه فشي وقت راسو مطبوخ هي عاد كتبغي تعاند وتجبد شي مواضيع..نزل على داك لكاس بارد ماتبدل فيها والو مازال داك عويشة الدويبة الشويطينة..
رجع جلس
هارون بهدوء كيدوي كيمسح على راسو:الوليد خاص تهزها وتسافرو بجوج تبردها شوية ورجعو حيت خرجات على السيطرة
بجوج شافو فيه عارفينو مقزدر
يوسف شاف تا عية ونطق:هدي عندك
بجوج تاني شافو فيه ويوسف كيجغم من كاسو التاني.
يوسف:صافي ايخطبو ليك؟
هارون:لا كتاب
يوسف:انا معاك فاي حاجة درتيها حاجة وحدة ماضلمش معاك هاد بنت الناس من بعد وكون مقتانع بهدشي لي كدير
هارون:شي حاجة مامقتانعش بيها ماكانديرهاش ومستحيل نزطم فيها
يوسف:داكشي لي بغيت
هارون جمع الوقفة كيقاد السمطة لي على خصرو فيها السلاح ولمينوط:نخليكم
لقا السلام وخرج من داك الشركة خدا السوارت وقبل يركب صونا الطليفون غير شاف اسمها جاوب كانت جوهرة:الو
جوهرة:خويا لاباس
هارون:بيخير ونتي
جوهرة:تانا
وقع الصمت وهي تنطق:مازال مالقيتيه
هارون:فاش انلقاه نتي اول وحدة اتعرف خوي راسك منو
جوهرة:ماقاداش اهارون بغيت نحرق قلبو كيف حرق ليا قلبي ..خود لختك حقها ياك كتقول كلشي يتخصر خاطرو الا ختي جوهرة ايوا لقاه باش يرتاح قلبي
هارون:نسولك؟
جوهرة:اه
هارون:وتش باغاني نلقاه حيت توحشتيه ولا باش ناخد لك حقك منو
جوهرة انفاعلات :هداك اخر واحد نتوحشو هداك واخة نزول قلبو بيدي من بلاصتو ماتبردليش
هارون ركب فالطموبيل وجبد باكيتو وقبل يدير لكارو ففمو نطق:هانية يمـ وت؟
بلعات ريقها لتواني وهي ساكتة ونطقات:لقاه بعدة
تسمعات صوت لبريكة كيشعل لكارو ونطق:ديريها فبالك كيما حرق قلب ختي انحرق قلبو بالاضعاف اجوهرة انخليه يتمنا الموـ ـت ومايلقاهاش ايخلص داك الدموع لي نزلو من عينيك
جوهرة عضات على شفايفها الجرح مابغاش يبرى
نطق وهو كيديماري:فوقاش اتجي للمغرب
جوهرة:فهاد السيمانة
جاتو دوزيام ابل من الطليفون دالخدمة:يلاه تهلاي
وقطع كان المساعد ديالو دالخدمة …وطفا الطليفون لاخر فمرا باش مايديرونجيه حد…
فجيهة خرا ..
داخلة للدار سلات خدمتها..جات مع باها قد قد راجع من الجامع قدات لعباية ساترة راسها كتر وقربات تحنات باست يديه:على السلامة ابا
محمد:الله يرضي عليك
ودخلو بجوج للدار..بدلات عليها ودخلات للكوزينة عند مها كتشحر اتاي:الله ريحة لمسمن واصلة لراس الدرب
حياة:ايوا صيبتهم على ودك سيري تجلسي نتجمعو عليه
داكشي لي كان تجمعو على الطبلة كياكلو بصمت محمد ماعزيزش عليه الهضرة فوقت الماكلة حتى كيصوني الطليفون دعبلة..غيتة طلات وهضرات:هدا الزاكي كيصوني عليك
عبلة خنزرات فيها وشافت فباها لي حط كاي داتاي من يديه من سيرتو
بقاو شي كيشوف فشي (الزاكي هو خوها لكبير)
محمد:نوضي جاوبيه شكا تسناي
عبلة خدات الطليفون وقطعات عليه:ماشي وقتو ابا دابة نولي نعيط ليه
ورجعو كملو ماكلتهم وباها تخسر خاطرو
حياة غرغرو عينيها بالدموع كيبقة ولدها كبدتها ماكرهاتش كون كانو مجموعين فوق هاد الطبلة ماشي هوما فجيه وهو فجيه..ويهضرو معاه بالتخبية ويتلاقاوه بالتخبية وياخدو من عندو لفلوس بالتخبية..محمد يقلب عليهم الدنيا لا عرفهم كياخدو فلوسو حيت فلوس لحرام..فلوس لحشيش والتبزنيز..
محمد شاف فيها لقا عينيها مغرغرين:اتوقفيها لنا على ود كلوشار مشوهنا فلحومة ها..هداك راجل يبكيو عليه الناس هداك خاص تنكريه
حياة بصوت باكي:صافي امحمد الله يخليك راه ولدي هداك طرف مني اول قطعة مني ولدي لكبير اول فرحة ليا وليك نسيتي شنو درتي نهار تزاد وعرفتيه ولد نسيتي شحال فرحتي وتسلفتي وتكلفتي ودرتي ليه احس سبوع نت لي سميتيه كان فين مامشيتي تديه معاك حفضتيه لقرآن كامل.ماكانش يتفارق معاك الله يهديك اه غلط وغادي فلغلاط ولكن مانسمحوش فيه ونخليوه بوحدو ماتاخدس فلوسو ماتشركش معاه الطعام ولكن ماتسمحش فكبدتك وماتخطش عليه راه الدنيا والزمان هدي توقع ليه شي حاجة وتندم علاش سخطتي عليه
عبلة غرغرو عينيها بالدموع خوها مايستاهلش هدشي..هو تبع داك الطريق على قبلهم غامر براسو على قبلهم وعلى قبل باههم باش يدير العملية…هو ماشي خايب هو احن واحد فيهم يلوح راسو فلعافية على قبلهم..فتالي بقة هو بوحدو خلص ثمن تضحيتو غالي وغالي بزاف…
محمد تواني وهو غير كيشوف فتالي قلب عليهم داك الطبلة وناض:بناقص كاع
خرج من الدار غادي فالدرب غرغرو عينيه بالدموع زير على داك التسابيح فيديه وكمل طريقو….
داز هاد النهار وجا نهار جديد…
راكبين اللور فاودي كحلة مجبدة الشيفور سايق بيهم…
طاهرة دايرة نضاضرها ديال الشمس ونزلات زاج الشرجم ملي وصلو للحي قلبها مشا وجا وهي كتخرج راسها شوية كتشوف فكل ركن من الحي فلحضة رجعات بذاكرتها اللور…لسنين دازو كيفاش كانت راجعة من الخدمة ميني كحلة وقميجة بيضة وكاب من لفوق شعر كحل مطلوق مسبسب كترمش بعويناتها الرماديين حتى كتبان لها ختها ليلى جاية من المدراسة هي وصاحبتها صوت ضحكاتهم واصل لقاع الدنيا مامسوقينش لعينين عباد الله ولعزارا اياكلوهم بعينيهم
ليلى وقفات كتجبد الطابلية من شكارة:تسناي نلبسها بالي تكون الطاهرة فدار ونمسح هاد العكار
حنان صاحبتها:ياختي هاد ختك كتزيد فيه
حتى كتوقف عليهم كي عزرائيل:ياك اشالوطية رديتيني بلكرون ولا كيفاش
حنان هربات وخلات ليلى كتفتف:علاش مالي اش درت
جرتها من داك الطابلية:زيدي انتفاهمو فدار
ليلى تنترات منها:بعدي منيي
بغات تشدها وهي تهرب ليها ومشات كتجري للدار باش دخل للبيت وتسد عليها
الطاهرة:والله لا بقات فيك
دازت عند مول لحانوت:شي جوج خبزات
حتى كيوقف عليها محجوب:جابك الله اري 100درهم
شافت فيه مخنزرة:منين خرجتي ليا نت عاود
بغة يجر لها الساك:قلت اري مية درهم فكينييي
طاهرة جرات الساك:جمع يديك ابنادم وبعد لهيه قتلتيني بريحة لبيرات
محجوب بدا يغوت:اري مية درهم راني خاسر فالقمر ودماغي ماهواش..بربي تانخرجك نتي وداك سليعفانة دختك للزنقة ويدوز عليكم النهار كحل
عضات على سنانها وجبدات ميات درهم لي كانت عندها ورماتها ليه فالارض:يعطيك موصيبة
هزها ومشا مخليها كتغلي؛لكلوشار لاخور
شافت فمول لحانوت وتنهدات:قيد هدشي عفاك
بقات فيه:واخة اختي فوقاش ماكان عندك اريها
تبسمات ليه بتعب وهزات السخرة ومشات للدار مابقات عندها كانةلة لوالو
نرجعو للواقع
لقات راسها وصلو وطلعو مع الدروج وهي مرفوعة تنهدات
عائشة دقات جوج مرات وحبسات كتسماع:عببلة حلي لباب شوفي شكون
جاوبتها:نوضي داك البرهوشة تحل لباب راني واحلة فالماعن
حتى حلات مها لباب وهي كتنكر:الدار عامرة بنات وشي شغال ماهو شغال تا لباب نحلها انا تفو يخليها سلعة كاع الناس ولدو…
وسكتات وهي كتشوف هاد الجوج قدامها بلعات ريقها كطلعهم وتنزلهم من شكلهم كيبانو برجوازين تلفات فالهضرة وبدات تمسح يديها لفازكين فالطابلية لي محزمة بيها:احم انا..سمحولي شكون نتوما
عائشة شافت فطاهرة وتبسمات:اتخلينا واقفين فلباب
حشمات وفتحات ليهم الطريق:لا قبلتو علينا تفضلو
تبسمو ليها ودخلو وهوما كيشوفو الدار طاهرة قلبها ايوقف مامتيقاش انه رجعات دخلات للدار لي حلفات عمرها تسول فيها ولا توصل ليها ..وعائشة كتشوف فين عايشين وتقلب بعينيها على عبلة
حلات باب بيت لجلاس صغير ومتواضع:تفضلو جلسو
وسدات لباب
جلسو وحطو داكشي لي جابو فوق الطبلة وجلسات كتشوف فيهم مافاهمة والو
طاهرة تلفات مابقاتش مركزة وعائشة ماعارفاش شنو تقول وكيفاش تفتح معاهم الموضوع
حياة:احم سموحولي راه ماعرفتكمش شكون..واش كتعرفونا ولا بغيتونا فشي حاجة
عائشة شافت فطاهرة:احم صراحة حنا
وشافت فـ الطاهرة:قولي شي حاجة
الطاهرة:فين هي بنتك عبلة؟
فالكوزينة..
دخلات عندها ختها
غيتة:وجدتي لغدة فيا الجوع
عبلة:وجدت الجغديد..تاكليه؟
غيتة:كوليه نتي نيت
عبلة:خرجي من الكوزينة مانشوفش وجهك غبري من قدامي
غيتة:نتي لي فوقاش اتغبري كاع صحاباتك تزوجو ونتي باقة واحلة هنا..تزوجي وهنينا يبقا ليا بعدة داك البيت بوحدي
عبلة جراتها من تريكوها:بربي تانهزك ونلوحك من هاد الشرجم
غيثة رجعات باللور هاربة منها وقفات حدا لباب ونطقات:تقدي تهزيني اياطوزة بعدة سيري ديري الريجيم عاد دوي معايا..
ومشات هاربة جيهت بيت لجلاس وعبلة تابعاها بالصندلة:بزاف عليك باطوزة المسلووتة
دخلات عليهم غيثة كتغوت وعبلة تابعاها بالصندالة حتى كيوقفو بجوج مصدومين من دوك الجوج لي جالسين فبيت لجلاس وحياة مخرجة فيهم عينيها ..
عبلة حسات باحراج وهي كتشوف فالطاهرة وعائشة من لباسهم والهيئة ديالهم باين لاباس عليهم بلعات ريقها وهي كتخبي الصندالة من مور ضهرها مافاهمة والو شكون هدو وشكا يديرو هنا وغيثة كتبرقق فعينيها مبلوكية عينيها على داكشي لي فوق الطبلة
حياة باحراج:احم لبنات عزيز عليهم اللعب
عب رجعات باللور وخرجات من بيت لجلاس رجعات للكوزينة:ويلي على شوهة ليوم المي تقتلنا شكون هدو بعدة تفووو.ما قلتلهمش تا السلام..
فبيت لجلاس..
عائشة وطاهرة شافو فبعضياتهم وتبسمو وشافو فحياة:بلا مانطولو عليك ندخلو نيشان فالموضوع
حياة:اهاه مرحبا تانا راسي ضرني مانكدبش عليكم
عائشة بابتسامة:جينا طالبين بنتكم عبلة للزواج لولدنا لا قبلتو علينا
خديجة خرجات عينيها فيها تبلوكات
طاهرة كملات:ولدنا شافها فالطبيب لي كتخدم فيه وعجباتو وبغاها للزواج هو حفيدي وعائشة ماماه نهضرو بيناتنا بعدة عاد نديرو خطبة ولاكط ويحضرو الرجال طبعا هدشي لا تافقنا ووافقتو
حياة وقفات بالصدمة ورجعت جلسات:بغيتو بنتي لولدكم
عائشة:اه الالة حياة
حياة ماعرفاتش تا شنو تقول:انا ماكانعرفكمش وشكون نتوما وشكون ولدكم راه تلفتوني
الطاهرة:ايلا سمعتي بعائلة الزعيم راجلي هو ناصر الزعيم وولدي هو يوسف الزعيم وحفيدي لي لي باغي بنتكم للزواج هو هارون الزعيم
خديجة بقات كتشوف فيهم شحال هاد اللقب دالزعيم دايز فودنيها شوية بحاليلا ضربها الضو ملي عرفاتهم شكون :واش عائلة الزعيم ديال بصاح زعمة هادوك لي كيهضرو عليهم الناس وكيديرو الخير ويعاونو الناس ولاباس عليهم
عائشة تبسمات:اياه الالة
حياة وقفات مامتيقاش كتسمع الجيران وفالحمام كيديوو على هاد عائلة الزعيم عمر جاها الفضول تعرفهم شكون حيت ببساطة ماعندها لاش وعمرها توصلهم اللهما تخيد غا فحياتها ومع عائلتها دابة هاهوما في قلب دارها باغين بنتها للزواج:سمحولي واحد الدقيقة
خرجات من بيت لجلاس ومشات للكوزينة عند بناتها دخلات عليهم مخرجة عينيها:عتقوني اراو كاس دلما عتقوو
عمرات ليها كاس دلما:هاكيي ياك لاباس شكون داك اليورجوازين
شافت فيها وهي كتشرب من لكاس ومداتو ليها:كون تعرفي شكون تسخفي وتعرفي لاش جاين اهيا ناري واش كنحلم ولا بصاح
عبلة شدات فيها:مالكي اناري شواقع
حياة:هدوك عيالات رجال الزعيم واش كتعرفو عائلة الزعيم ولا لا
عبلة وغيتة شافو فبعضياتهم لتواني
عبلة:كيفاش عائلة الزعيم ماعرفتش
خديجة :اويلي معامن انااا ..باكم نهار جا وقالك تبنا جامع جديد ايولي يأدن فيه وقالنا لي بناوه هوما عائلة الزعيم وانه كيتهلاو فيهم وكيخلصوه مزيان ويجيبولهم لمالكة للجامع
عبلة :اااااااه عرفتهووم اويلييي الصبيطار لي خدامة فيه انا راه ديالهم اويلي واش عائلة الزعيييم
خديجة:ايااااه مرت الكبير ديالهم وعروستو هوما لي جالسين فبيت لجلاس
عبلة :ولاش جاو مالهم شبغاو عندنا
حياة:جاو يخطبوك لولدهم اش سميتو قالتلي اش سميتو ياربي اه هارون الزعيم
عبلة خرجات فيها عينيها:يخطبوني انا كطنزي ياك ولا شنو منين كنعرفو ولا كيعرفني براكة هضري اش بغاو
خديجة:اقسم بالله ابنتي تا جاو يخطبوك لولدهم
عبلة:لا من نيتهم مخلين بنات الالبة وجاين لعندي انا لا وفين عمري شتو ولا شافني باش ايبغيوني ليه..
حياة:وا المسخووطة راه هو لي قالهم خطبوها شافك فالسبيطار وصيفطهم يخطبووك الله ..ياربييي لا كنت كنحلم غا خليني ناعسة مانفيقش تاندير العرس لبنتي
عبلة مافاهمة والو مصدومة عائلة الزعيم جاين يخطبوها لولدهم..كيفاش جاين يخطبوها راه عائلة الزعييم هادي راه الحماق هدا وخرجان لعقل..واخة ماكاتعرفهمش شخصيا ولكن كتسمع بيهم
حياة:انا فرحانة ابنتي كنت بغيت ليكم رجال يهزو بيكم ويعوضوكم على هاد التكرفيس عا ربي جابو تا لبين يديك
عبلة:امي خلبنا بعدة نسمعوهم شغا يقولو ونتي دغية
حياة:..جيبي الصنية داتاي واجي لحقيني خليناهم كيتسناوغ
ومشات لبيت لكلاس:سمحولي خليتكم بوحدكم
عائشة:ماشي مشكل خودي راحتك
عائشة بتاسمات يلاه اتدوي وهي تشوف عبلة داخلة بالصنية بقات كتشوف فيها ..سميمرة وعوينات كوحل مرمشين وكبار ..شعر كحل جامعاه اللور .وجها مدور والخديدات وشنايف كبار ..قصيرة شوية ومفورمية شوية دبدوبة مع لابسة بيجامة لاصقة عليها بنات فورمتها صدرها كبير وتريمتها مهزوزة مبومبية..زويينة وباينة حربية وبنت دارهم…
عبلة تبسمات ليهم:سمحولنا ماشي قد دخلتكم هادي جيتو مع الروينة
عائشة:نتوما سمحولنا على هاد الدخلة احم ولكن ولدي قال اليوم سيرو وجيبو لخبار باش نبداو فلاكط هههه مزروب
عبلة شافت فيها :عمري شتو وماعرفتش فوقاش شافني
عائشة:هو شافك وعجبتيه وجاب العنوان ديالكم وكلشي وقالنا خطبوها جانا نيشان بلا تلاوي
عبلة هزات راسها باه وحياة كتمد ليهم اتاي
عائشة:انا ماغانشكرش ليك راسنا ولكن لي انقولك انه عبلة اتكون وحدة منا بنتنا وختنا ومرات ولدنا ..وماغاتشوف منا غير الخير ..ولي بغاتها حنا معاها..ولدي خدام مع لبوليس وعندو بزاف دالخدمة فهاد الايام القضية شوية مرونة عندهم..على داكشي ماجاش معانا ولكن من بعد اتشاوفو تخرجي نتي وياه خريجة بوحدكم تعارفو مزيان ..وايلا قبلتي بهاد الزواج ولدي ماباغيش العرس ولكن نديرو حنا شي حاجة بيناتنا لعيالات ..وبغة لاكط فأقرب وقت باش من بعد لا جاتو شي خدمة مايتلهاش معاها يعطيك تانتي وقتك وتسافرو وتخرجو ..والصداق وداكشي حتى تفاهمو مع مول الدار وتفاهمو معاه على كلشي..
حياة تبسمات:وعلاش لي مانقبلوش شرف لينا نتناسبو معاكم نهار كبير هدا نتوما قصدتونا بنية حسنة وجيتو تا للدار وتواضعتو معانا وحنا ماعلينا غير نقول الله يكمل كلشي بالخير راجلي كيجي فالعشية انهضر معاه واخة هو ديما كيشكر عائلة الزعيم
عبلة كتخرج عينيها فمها ومها مامسوقاش
عائشة بفرحة:شرف لينا حنا قبلتو علينا نهار كبير هدا ..راجلي وحمويا وولدي هارون ايتجمعو مع راجلك فأقرب وقت يهضرو فالتفاصيل من بعد نديرو كلشي فنهار واحد..
عبلة شافت فمها
عائشة:عبلة بنتي قولي شي حاجة لا ماعجباتكش شي حاجة قوليها ولا ماكنتيش موافقة قوليها الدنيا هانية كلشي كيرجع ليك نتي
عبلة:سمحولي واحد الدقيقة..المي اجي ندوي معاك
ومشات للكوزينة وتبعاتها مها:اويلي مالك
عبلة:كالك مزروبة كيفاش موافقين..حنا باقي ماشفنا تا لعريس
خديجة:من نيتك اش باغة كتر من هدشي بغيتي التكرفيس مع شي واحد مزلوط
عبلة تنهدات ؛وا مي خاص نشوفو ونهضر معاه ونسمعها منو هو شغا ندير بمو وجداه..مالي شايطة على راسي ماعرفناه فيه شي ديفو عرج ولا عور ولا شي مسطي باغين يتفكو منو لا امي انا ماكانتيقش فهاد الناس لي لاباس عليهم
حياة:العورة هي نتي فهاد الساع ياربي عطيني عوسنة ياربي عطيني جوج
عبلة:مي ماتزوبيش عليا
حياة:الله ياربي بديتي تنحسي سكتي وتوكلي تلى الله راه مازال ايهضرو مع باك دابة تحركي خليناهم بحدهم
ورجعو لعندهم
عائشة:كلشي مزيان ؟شنو بن لك
عبلة شافت فيها :كلشي على الله حتى تزيدو تهضرو فالتفاصيل مع البا
عائشة تبسمات فرحانة:ادن نقولو مبروك
حياة تبسمات :الله يكمل كلشي بالخير
وبدات كتزغرت وطاهرة وعائشة كيضحكو..عبلة غير كتشوف مها كيف مزروبة..غيتة كتشوف فسيكانهم وطل تشوف شنو فيهم وعينيها على داكشي لي فوق الطبلة..
داز الوقت..
هبطو معلهم للباب
عائشة:هادي النمرة دهارون قيديها عندك وهو دابة يعيط ليك هاد الليلة صافي
قيدات نمرتو وكتبات عليها هارون وعطاتها نمرتها تاهي باش تعطيها ليه..وتبادلو النوامر دعائشة وطاهرة وركبو فالطموبيل ومشار
حياة بقات واقفة كتشوف فالشراجم وفالبيبان الناس كيطلو نطقات بصوت مرتافع:ايوا الله يكمل علينا بالخيير بنتي اتدي حفيد الزعيم
عبلة جراتها:زيدي امي زيدي…مالك مزروبة شوهتينا..
غير دخلو للدار نطقات:سمعي امي ماتقولي وافقت تانهضر معاه ونسمع منو ويعجبني
حياة:ويعطيك اللقوة ونتي غير كتعكسي راه قالت ايعيط بك
تنهدات ودخلات للبيت كتشوف فنمرتو كتسناه فوقاش يعيط ماتموش متحمسة وعاجبها لحال ولكن خاص تتعرف عليه
داز الوقت..
كتصوني عليه وتعاود فتالي جاوب:شنو كاين الوليدة
عائشة:ايوا مبروك عليك صافي وافقو انا فرحانة بزاف البنت عجباتني
هارون:ايوا مزيان
عائشة:كيفاش ايوا مزيان مالك مافرحانش اناري
هارون:الوليدة راني مشغول
عائشة:اتسنا خاص تدويو مع باها الهضرة دالرجال وداكشي وخاص تخرج نت وياها شي خريجة تتعارفو وخاص تعيط لها هاد الليلة راه غتسناك صيفطت لك نمرتها فالواتساب
هارون:يلاه هنا انقطع
عائشة:عنداك تنسى ماتعيطلهاش
وقطع…
..
داز الوقت..كانت بدات تغرب الشمس..
نازلين من داك طيارة الخاصة فالمطار لقاو الشيفور كيتسناهم بالطموبيل ديالهم لفيراري ..صوت ضحكهم مسموع..الشيفور تبسم عندو عزاز هاد التوام واخة شي مرات كيعيقو بداك الشغب ديالهم ولكن خالقين جو فاش كيغبرو كيتوحشوهم…
عمران نقز اخر درجة وقرب كيسلم على الشيفور:البَّا حاجيب الامور هانية
حجيب:الحمد لله
فهد 🐆 رب ليه تاهو كيسلم عليه حل ساك أدو ديالو وكبد واحد لبوتطة من تماك:ها لكادو ديالك با ماتقولش نسيناك
حس بواحد الفرحة فشكل وهو كيشوف داك لبواط:لاش معدبين راسكم
عمران:ماكاين لا عداب لا والو
وخداو منو سوارت الطموبيل:يلاه تهلا تا تحيب معاك داك الشوانط الله يخفضك
هز راسو باه
كان فهد لي سايك مجهدين لداك لموسيقى تا لتالي وكيغنيو مرونينها فالطريق
فهد نقص للموسيقى:شنو بان لك نتقداو شي طريف
عمران:ايااه أعمي نيت نقادو للمزاج قبل ماندخلو للدار
فهد بدل الطريق خارجين الشاريع مبعدين من اللحياء الراقية تابدلو يدخلو لحي شعبي هنا هيطو السقف ديال الطموبيل وطلعو الزاج فيمي …تا وصلو لواحد الدرب ووقفو حدا واحد لباب
عمران:كلاكصوني
كلاكصونا وهبط الزاج
فهد:وا لقلـتوي طلع داك الزاج بغيتي يشوفا شي حد
عمران:دنيا خاوية
طل عليهم واحد من لفوق كيشوف طموبيلة مجهد:شنو تما العشران
عمران:دوز لنا الزاكي لكتامي
الدري:ماكاينش كاين شي مانقضيو
عمران شاف فهد:شنو نتقداو من لخدام
فهد:لخر مرة تقدينا من لخدام عطانا طرف بارد دارلنا الشقيقة صيار ندور ليه
صونا عليه:افين الكتامي…جينا المغرب…وياه ومالقيناكش…على حسابك؟…صافي سير عالله تانتشاوفو
فهد:صافي خود من عندو
رجع طل عليه:هبط أبايا عندنا
خونا كان هابط حيت الزاكي لكتامي صونالو كان فلخصر ديالو واحد ساك:شحال اخويا؟
عمران:شي جرج مبرومين و150 امبوغطي
خونا ضحك:هي اللولة هاجوج مبرومين وها 150 اومبوغطي
خداهم من عندو:يتوب على خويا
ومد ليه لفلوس:تهلا
وديماراو الطموبيل وزادو غاذين بحالهم…كل واحد شعل جوانو كيتنغمو عليه
عمران:خويا ديربنا داك ديسك ديال انا لا ادوخ الا بالصاروخ
فهد مد يديه خدم الموسيقى:هنا اخوياا تمزك ليا مع راسك…
طولو الطريق بلعاني تا يساليو الجوان…
وصلو للدخلة دلقصر حلو الطموبيل تتهوا كيرشو فلعطر ويمدغو فلمسكة
فهد:الوليدة قالت ماكاينش هارون مالنا على حالنا
عمران:ماتعرف يعت معانا فاي لحضة نديرو احتياط..عيني صافين ياك
فهد:لا وانا
عمران:تانت..
وكملو طريهم نزلو ودخلو لبداخل كيشوفو عائشة والطاهرة فالصالة:ها قد عدنا اليكم من جديد…توحشتونا ياك
ماضت عائشة كطير عنقاتهم بجوج:وشحال توحشتكم
كيبوسو فيها ويعنقو:كون تشوفي نتي العمر
عمران :حيد حسد نشوف الزين
عائشة رجعات اللور غادة جاية قدامهم:ها زدت زيانيت
فهد:اضياماند اعمييي
وقرب باشها من خدها:كتديدي غاتدياني
شافو فالطاهرة:وها الزين لفتان
ناضت واقفة منبسمة ليهم قربو ميبوسوها واستقبلاتهم بالاحضان وهوما كيتغزلو بيها وجلسو وسطهم كيهضرو ويعاودو ليهم على السفر…
عائشة:واخيرا خطبنا لخوكم..
فهد:وتيلييي كي درتو ليها قلنا عمرو يتزوج عقليتو صعيبة
عمران:قلنا عمرو يلقا هدي لي باغي..غتكون شي قنبولة نيت شي وحدة هاربة
عمران:هدي لي طيحاتو اتكون دمااغ نيت
طاهرة:صراحة ماكاتبانش ساهلة كتبان مرزنة وينت لخسر بعقبهل وتل الزين مسرارة داك الزين لخمري مبرونزية
عمران:هنا تاني على السمورية
عائشة كتعاود لهم وهوما ميتين بالصحك
عمران:هاز لها الهم من دابة شكا يتسناها
داز الوقت طاحت الضلمة..
كانت جالسة فالصطاح هدا هو الوقت لي قالتلها عائشة ايعيطلها فيه…
متكية على الصور وحتطة الطليفون فوقو وكتسناه يعيط كل شوية تشوف فالطليفون وترجع طل على الدرب …صونات لها صاحبتها قطعات عليها خافت يصوني ويلقاه اوكيبي
عبلة:هدي يلاه التسعود مازال فين يعيط…
فجيهة خرا
كتصوني كتلقاه طافي بقات غادة جاية فالصالة:اويلي ايحاشمنا مع البنت ااسيد طافي الطليفون كاع
طاهرة:راه باقي لحال دوزي تجلسي
عمران كيتسارا فلانستا وفهد جالس حداه كيشوف معاه تقول ماعندوش طليفونو
فهد:رجع رجع…شكون هاد الزوينة
عمران:ماعرفتش مدلخو نشوفوها
دخلو كيتساراو فالكونط ديالها
فهد:حيد عليا ماعنديش مع هاد النوع
عمران :تانا
وخرجو من عندها..
عائشة مازال غادة جاية:ناري على بلان ايديرلي مع البنت كوراها كتسنا
عمران:بداية المتاعب هاد البنت مسكينة ماعارفاش راسها مامن طاحت
فهد:نهار انتلاقاها وانسولني على هارون كي داير انعاود لها على كاع الدكاكة لي دوز علينا
عمران:هههههه تعقل نهار لقانا مبوقين خرجنا للجردة ودارنا لمينوط حدا لكلب تخت الشمس كتحرق كان الصيف شخد نهار كامل وحنا تماك الشمس دوخاتنا ولعطش قتلنا
فهد:ههههه وا لكلب حن فيه وحاطو تحت الضل وانا وياك تحت لعافية مع مبوقين ولينا كنشوفو. راسنا فجهنام ونت كتقولي الله على جهام شحال سخونة ههههه
عائشة:كتقولوها بوجهكم حمر على الزين ضوصيكم نتوما كديرو علاش
وشافت فالساعة:ويلييي الله ياربي على راجل ولدت
دازو تلاتة دسوايع
كانت غندهم مداهمة للمجـ رم لي تيرا فلوزير صدق ولدو بغة يصفيها ليه ملي قربو لانتخابات باش ياخد بلاصتو ويمـ وت باش يكسب تعاطف الناس وايصوتو عليه..
هارون كان من اللول شاك فولدو هو مول الفعلة حيت هاداك لي تهموه كان بالنسبة ليه باين ماشي هو واخة كاع الدلائل كانت عليه ولكن بقة ملاحقو تا جاب الدليل انه ولدو مول لفعلة بالصوت والصورة وهو كيعتارف..
سالة التحقيق ..
خرج من داك الغرفة كيطرطق فعنقو دخل للمكتب كيحس براسو بدا كيضرو ماخداش الدوة نهار كامل ومع الخدمة والمداهمة والتحقيق بدا يضرو جلس فوق لكرسي مرجع راسو اللور كيحس بداك لحريق كل شوية كيزيد يجهاد غمض عينيه كيحس بداك لقرطاسة فراسو كتتفنن بالوجع براسو هدشي ماواصلش لداك الدرجة من الوجع لي كيخليه واحد اخور وهدشي ماتعصبش لدرجة يضرو راسو ..وصلو ميساج من طليفون دلخدمة قراه كان من عند مروان(المتوحد) كاتب ليه: مروان دابة عندو مهمة كاينة مافـ يا عندهم تبادل البضاعة بلفلوس كاين سطاح وكاينة عمارة فيها شرجم كيطل عليهم..ومروان محتار واش يكون فالسطاح ولا الشرجم من العيمارة مقابلة مع لعمارة لي فيها السطح؟
هارون تنهد كيماصي راسو كتب ليه:شكون لي قريب من المـ افيا ولي بلاصتهم مناسبة كتر؟
تواني وجابو:مروان كيقولك بجوج مناسبين..والشرجم قريب للمافيا
هارون كتب ليه: ايلا كنتو نتوما بيكم بزاف وواجدين للهجوم شوف الشرجم وايلا كنتو غير شوية عاد ايجيو ليكيب خود السطح اي بعيد باش لا نتابهو ليك تلقة الوقت فين تهرب
مروان كتب ليه:مروان كيقولك شكرا
مروان هو القناص ديال لي كيب حيت ماكايزكل تاشي هدف لحد الان عمرو فلت شي هدف من الضربة اللولة كيجيبها فالشخص المطلوب…
هارون تنهد ماشي هدشي لي كان باغي هو دابة خدام فلبوليس وهدشي ماباغيهش كان حلمو يكون فالمخابرات قرا فمدرسة عسكرية خاصة بل بالـ اف بي اي كان هو اللول فالدفعة ديالو كان كيتقن جميع المهام من فنون قتالية وكرجل قناص..وتصويب الاهداف..وفالدكاء فحل اي قضية وكيفاش كيعطي الخطط لي اتبعو لا بغاو يتجسسو على شي ما فـ يا ولا شي منضمة ارهـ ابية وغيرهم..كيفهم فالقرطاس فالقنابل فاي حاجة .كان متفوق بزاف..حتى كان فمهمة وتغدر وتضرب بلقرطاس فالراس مشا فغيبوبة فقد الذاكرة لمدة شهر بزاف دلحوايج باقي ناسيهم شي تفاصيل من داك الحادثة لي وقعات..ولا عصبي بزاف خصوصا فاش كيضرو راسو كيخرج على السيطرة يقد يقتـ ل ومايحسش..هدشي لي خلاهم يعفيوه من رتبة رجل مخابرتي ويرجعوه كرجل امن خدام فلبوليس حيت المخابـ رات كيخصها الدماغ يكون مريكل واحد مبرد مهدن.. هكا كان اصلا مهدن وكيخدم غا عقلو..من مور الحادثة ولا واحد اخور..اكتر عدوانية واكتر صرامة خصوصا فاش عفاوه من خدمتو لي كان من طفولتو كيحلم بيها وخدم عليها مزيان وكان ايزيد يترقا..باش فتالي يرجعوه فالامن الوطني ..واخة واخد رتبة مجهدة فالامن ولكن عمرو حس بانه مرتاح وانه باغيها كاع القضايا كيجيه ساهل باش يحلهم مقرنة مع داكشي لي كان كيعيشو فالمخـ تبرات فرق كبير…كريم وهارون كملو فداك الميدان دالمخايرات بقاو ثنائي من بعد ماكانو تلاتي..والحد الان فاش كيوحلو فشي قضية ولا مهمة ولا فشي حاجة كيعيطو ليه يعاونهم… والحد الان باغي يعرف شكون هداك لي تيرا فيه وعيجبدو واخة من تحت الارض وداك لقرطاسة لي عندو فالراس بيها غيتيري فيه نيشان لوسط الدماغ
تمتم بحقد قاتـ ل:ايلا نت ماعرفتيش تيري باش تقتـ لني انا غنحكمك مزيان
بمجرد دماغو رجع اللور بدا دمو كيغلي وبدا كيحس براسو كيتعصب وهدشي لي ماباغيش..ناض حل واحد لمجر جبد الدوة شرب تلاتة فدقة..
سمع الدقان ماعندو كانة لحد :دخل
دخل المساعد:هداك لي صيفطتي ليكسب باش يشدوه راه جابوه
هز راسو باه كيطرطق فعنقو كيحاول يكالمي راسو مازال لحريق فالدرجة لاولى خرج من المكتب ودخل لغرفة التحقيق لقاهم كيستجوبه وهو ماباغيش سعتارف انه داك السلعة لغير قلنونية ديالو…دقايق وهو كيشوف فيه ولحريق مديرونجيه غمض عينيه لتواني عاض على سنانو وملهم ونيشان قرب ونزل عليه بكروشي دوخوو وزادو التانيي والتالت ولبوليس رجعو اللول ماقادين يديرو والو ومتيقدوش يقربو
هارون كيشوف داك خونا كبو دمايات وكيرجف نطق بصوت مغزف :مانبغيش نسمع شي حاجة انا ماباغيهاش
بدا كيهز راسو بالزربة بخوف وجهو كلو تفرشخ ودوك بصوت تقيل شاداه السخفة:براك عفاك انهضر صافي عفاك ماضربنيش
هارون رجع اللور كيماصي فراسو مخنزر خاصو غا معامن:سجلو اقوالو وخدا يهبط لميلف للمحكمة واستدعيو الشهود..
وخرج مخلي داك خونا كيعتارف بكلشيي وختيف لليرجع ليه هارون..
هارون خرج من تماك كاع باغي يضرب فيه بهاوك باغي دماغو يتقاد باغي يتهدن باش يمشي لحريق ماخدو مازال فالدرجة الاولى ركب فالطموبيل ونبط الزاج وديمارا غادي غير بشوية خدم موسيقى هادئة باش يريح اعصابو مرجع راسو اللور وكيشوف فالطريق مد يديه شعل الطليفون جاوه ميساجات دليرابيل من عند عائشة داير فضيحة لمح ميساج:واااا البنت كتسناك تعيط ماتحاشمنيش معاها عيط لها ضاروري
دخل لكونفيغساسيون ديالو مع مو طلع لفوق لقة نمرة عبلة دخلها ووقف الطموبيل فالجنب