تعاشات العشية وخنساء منشورة فبيتها دايرة الكيت فودنها كاتموسق ودندن مع راسهااا ... دخلات عليهااا رانياا بزربة : بنت السااايب توحشتك ...
خنساء قفزاتها حيدات الكيت : مالكي داخلة بعجاجتك اصحبتي خلعتيني ...
رانيا كلسات حداها : نتي راك تخلعي ماتخافي ... اش كاتعاودي ؟؟
خنساء : والو غير الدار والروتين قنطت والله ...
رانيا ابتاسمات : حتى انا جيت على هادشي غدا نخرجوا شوية انا وياك ...
خنساء ميقات : باااز بحال الا انا كانخرج وقتما قالهالي راسي ... با العربي مغاديش يخليني
رانيا بعجرفة : وشكون قالك غادي نقولو لعمي العربي راه خارجين نضوروا ...
خنساء : واش غانديرو الفهيمة ؟؟؟
رانيا عوجات فيها : حسيت بيك هاد الايام فحال يلا تكلختي ... حتى دماغك جاه الخموول ... ( خنساء خنزرات فيه )....
رانيا كملات : صافي صافي بلاما تشوفي فيا ديك الشوفة ... غانقول لعمي العربي راااه غادي تمشي تقضي معايا شي شغل غدا عشية ومغاديش يقول ليا لا ...
خنساء ابتاسمات : بصح وفين غانمشيو؟؟
رانيا : لواحد القهوة زوينة بزااف شفتها فالانترنيت وفيها اتمنة مناسبة ... كايديرو لي كرييب وااعريين شنو بان ليك ( غمزاتها )
خنساء بغات غير ايمتا تخرج : ايه واخا غير شوفي مع باااا ...
رانيا وقفات : هي دابا راه خليتو كايصلي المغرب التحت ... نوضي ....
جراتها وهبطوا كايتجاراو لقاو العربي متكي فوق السداري شاد التلفازة كايتفرج فالاخباار ... وقفات ليه رانيا عند راسو وخنساء وراها ...
رانيا دايرة ضحكة بريئة : عمي العربي بغيت نطلبك واحد الطليبة عافاك ...
العربي باصغاء : ايه ابنتي .. قولي ؟؟
رانيا كاترمش : المهم بغيت نقاد شي وراق لماما على قبل المحال ديال الحلوة لي بغات تدير ... وماكرهتش تخلي خنساء تمشي معايا تونسني غدا فالعشية
العربي هز حاجبوا : وعلاه هاد الوراق مخاصش ماماك لي تمشي تقادهم وعاد اشمن وراق فالعشية ياك بحال هادشي كايبغي الصباح ..
رانيا بتوتر : لا اعمي رااه ديجا كلشي مقااد خاص غير نجيبهم ليها ... عافاك اعمي مغاديش نتعطلوا الله يخليك ...
العربي تنهد فينما كايطلبو منها شي حاجة مكاتردهاش فوجهم جات عيب يردها دابا ... حرك راسو بايجاب : واخا ابنتي غير ماتعطلوش ...
رانيا طارت باست على راسو : الله يخليك لينا اباا العربي ... هههههه مغاديش نتعطلوا كون هاني ..
العربي : الله يرضي عليك
خنساء فرحات من الداخل وماباغاش تبين ...
رانيا ابتاسمات : يللاه انا غانمشي ( شافت فخنساء ): نتلاقاو غدا عشية واخا ( غمزاتها )
خنساء ضحكات : واخا ان شاء الله ...
ودعاتها وزادت من تمااا خرجات وخنساء بقات كالسة كاتفرج مع باهااا ... عاد ناضت توجد العشا بحكم الطياب ولا كولو عليهااا ...
ملاك دخلات للبيرو مبتاسمة حلات الباب كان مهدي باقي كايقاد شي حسابات مركز معااهم ... هز فيها عينو وشار ليها تكلس بحال الا ماوقع والو : اجي املاك اجي ...
ضحكات عاجبها الحال عارفاه دغيا كايتفش ... كلسات مقابلة معااه : راني درت لي قلتي ليا ...
المهدي هز راسو بايجاب : واخا مزيان ... ( مد ليها واحد الورقة ): هادو باقي ماتخلصوا يمكن نسيتيهم ...
ملاك قراتهم : لا لا اليوم كنت غاندوز نخلصهم دايراهم فالبال ...
المهدي هز فيها راسو حاط الوراق : مزياان ... ماعندي مايتسالك كلشي هو هاداك ...
ملاك بابتسامة مسبلة فيه عينيها : ايوا لاباس بعدا مني قلتي شي كلمة زوينة فحقي ...
ضحك بطنز : ههههههه غير حيت غوت عليك وليت خاايب ... الالة مقبولة من عندك ...
ملاك : ههههههه وشنو مني كايتعلق الموضوع بالخدمة كاتنسى اني صديقة ديالك من ايام الدراسة وكاتولي عليا مديييير ههههه
المهدي : نتي عارفة عندي الخدمة هي الخدمة ... واصلا راني المدير شنو يحساب ليك ههههه
ملاك : ايوا اسي المدير راه واحد لا ماشين ديال القهوة خسرات ... خاصها تبدل حيت واخا كانقادوها كاتعاود تخسر غير ديرها فبالك ...
المهدي : هههههه واخا الالة ... انا غانشوف ليها شي حل ... ( وقف كايقاد نظاظرو الشمسيين )
ملاك بتساؤل : صافي غادي ؟؟؟
المهدي : وي عندي شي غراض نقضيه وزايدون راك قايمة بالواجب مانخافش عليك ...
ملاك : داااكووغ ... اه مهدي اش بان ليك نخرجوا اليوم نتعشاو انوصومبل ... ( عضات على شنايفها كاتلعب بشعرها ): شحال ماخرجنا ...
المهدي بهدوء : فصراحة املاك ماعندي كانة لخروج هاد الساعة خليها لمرة اخرى ونخرجوا مع نادية مجموعين ( غمزها ): ماعندها معنى نخرجوا غير انا وياك ولا لا ؟؟؟
بلعات ريقها سارطة القمعة : اااه بصح .. واخا ( فركات يدها بغضب ): سلم ليا على نادية معاك مني تمشي للدار شحال ما شفتها ...
ابتاسم ليها : مبلغ ... يلااه نخليك ....
هز جاكيط ديالو وزاد خارج من تما وهي بقااات محقدة عينيهااا : ععععععععع اوووف اوووف ... اش هاد الزهر عندي ياااااربي ...( باصرار ): ولكن غير بيا ولا بيك امهدي مغاديش نخليييك واخا يوقع لي بغااا يوقع ...
زادت من تما خارجة مفقوصة تقابل شغلهاااا ...
المهدي ركب فللوطو يلاااه غايديماري وهو يصوني ليه التلفون : الوو ... وي سي التهامي ... وشحال عطااك ؟؟ ... ( خنزر ): راني قلت ليك قل من داك التمن ماتبعيش ... اييه عارف السوق طايح ولكن واخا تبقى عندي تما مانبيعهاش بالخسارة ... اسيدي نتا ماعندك غراض غادي تاخد نصيبك وانا لي غانصدق خاسر ... غير خليهاااا تماا حتى يطلع هاد السوق ونبيعوها مازربانينش ... الله يعاونك ... بسللاامة بسللامة ...
قطع كايسوط : هاد السماسرية خاصهم غير يتفكواا .. بفففف ... ديمارااا وزاد فحالاتووا ...
كاان عصام ݣالس فبيتو قدام لبيسي مفيكسي عليه عينيه غارق فلخدمة...دخلاات نسرين لعندو بتاسمات ونطقات:حبيبي يلاه نخرجو...باقي لحاال..قنطت فداار
عصام رد بلا مايشوف فيهاا:مكاتشوفينيش خداام...مامساليش مرة أخرى ونخرجك...
نسرين غوبشاات بملاميحهاا:وااش لخدمة فالزنقة، لخدمة فداار...وااه بزااف هاادشي...
عصام شاف فيهاا ونطق بهدوء:معندي مندير ليك...خدمتي هياا هادي...مرة كاتكون مشراجية مرة كاتكون مرخوفة...هادشي لي كااين...
جوبااتو بنبرة عصببة: مااسوقيش...غدااا غانخرجو هيا غانخرجو...صافي...
عصام رجع كايخدم ونطق غير مهتم:واخاا واخااا حتاا لغدا ان شاء الله...
نسرين لواات فمهاا حسات بيه غير بغاا يسوسهاا بديك واخة...ناضت من حدااه يلاه غاتمشى وهياا تعفط على قاميجتو فلأرض...كيفما جا من لخدمة بدل عليه لايح حوايجو فلبيت....تحناات عليهاا وهزاتهاا بنرفزة ونطقات بنفعاال:اعصااام..واش كل مرة نبقى نعاود معااك نفس لهضرة؟!...ياك كاانقوليك ملي تبدل حواايجك طويهم ورجع ستفهم فلبلاكاار..مغايخدو منك حتاا خمسة الدقاايق...
عصام مركز فخدمتو بلا مايشوف فيهاا:واخااا غير طرفيهم فشي بلاصة نكمل ونوض نطويهم...
نسرين بفقصة نطقاات كاتغوت:واخاا واخااا...مية مرة ونتا كاتقولياا فهااد واخاا وشي مكديرو غير كاتصدرني بيهااا...قوول لاا وهني لوقت...
رد عليها بلغواات حتاا قفزهااا:لاااا يلاااه سمعتييهاااا ..بربي مغانقادهم وتفركعي..اكبر حيط قدامك سطحي معاه رااسك...
نسرين خرجات عينيهاا بصدمة:وكتحلف علياا من لفوق...
خنساء كانت دايزة وسمعاات صوت مجهد فلبيت وهماا كايتنااقشو...
عصاام (ديجاا معصب بلخدمة وزادت عصباتو بهضرتهااا) رد بلغواات:اااه كانحلف..ودابااا تزيدي كلمة أخرى... غانوض نجبد مو داك لبلاكار كامل نخوي ݣااع لحوايج لي فيه...وݣلسي طوي على قلبك بلمعقول دييك سااعة....
نسرين:و.. ولكن مالك شعلتي فياا هاكاا.. اناا مقلت ليك واالو...
عصام نااض من بلاصتو هااز معااه لبيسي ونطق مخنزر فيهااا:صدعتي ليااا مخي... نمشي نكمل هااد لخدمة فلقهوة حسن لياا...
هز بزربة جاكيط دياللو وخرج من لبيت...ضرب فخنسااء معصب ومشا خرج عاطيهاا بضهر ونسرين تبعاتو من لور
مابغااتوش يتقلق منهااا...
كاتعيط عليه مرفعة نبرة صوتهاا تحت أنضار خنساء لي غير بقات كاتشوف فيهم بلا ماتدخل:وعصااام رجع...ماالك كبرتيي لموضوع انا مقلت لييك واالو...عصاااام...عصااام
عصاام مدهااش فيهها ومشااا خرج ساد لباب من ورااه...رادخوو..وهياا واقفة كاتشوف فجيهتو متحصرة وحايرة فنفس لوقت مفاهمااهش
خنساء شافت فيها و تنهدات مقربة لعندها : ربي واش مكاتعيايش من النكير انسرين ... الله يهديك راه بالكلام الحلو كايتكال العسل اعمي الجمل ... ماشي بوا واوااا ... ونتي كاتشعلي كيف الوقيدة مكاطفايش ...
نسرين : وراه غير دويت معاه مادرت والو ... ولاهيلا ...
خنساء بهدوء : سمعي الراجل راه بحال الدري الصغير جيتيه للخاطر تاكليه بحوايجو جيتيه للزكير والجحاد هو اللول فيه ولي قلتيها ديالك ... بلاصت ماتجعقي عليه وتحفي حلقك وحجرتك على الخوا الخاوي ... عرفي كيف تجيبيه لصفك وتاكلي ليه الدمااغ راه الحيلة غلبات العاااار ... والمرأة اللحلاحة غلبااات السحاارة ...
نسرين تنهدات : بحال الا ماكاتعرفيش خوك راه عييت ماندير ليه فالخاطر ووالو راسو حجر ...
خنساء : الا هو راسو حجر نتي راك مرأة ... مرأة ... وكيد النسااا رااااه عظييييم ... ( غمزاتها ): وعندك كااع المقومات لي تخليه خااااتم فصبعك بلاما يسمعك العادي والبادي ... راه الا بقيتي على هاد الحال لا نتي لا هو نا فخير ... ديري فبالك اللسااان لي كايقول الزمر كايعرف يقول حتى التمر امراات خويااا ...
زادت من تما خلااتهاا ساهية كاتفكر فكلامهاا جاها على صواب وبغات غير ليها المصلحة ... عارفة ان خنساء واخا قبيحة ولكن قلبها بيض ومكاتبغي الشر لحتى واحد ... واصلا هضرتها كلها صحيحة واخا كاتحفي صوتها معاه لي فراسو فراسو ... خاصها تولي تعامل معاه بالسياسة ...
هار جديد مشمس طل على ابطاالنا ... داز طاااير خصوصا ان خنساء قضات فيه شغلها كامل بكري بااش تخرج وتفوج مع راسهاا ... حلات بلاكارهاا جبدات منو جلاابة هماااوية سوداء مطروزة بالضوغي و الحمر داكشي خفيف ... كاتحماق على الجلالب والبلدي بصفة عاامة وكاترتاح فيه ... طلقاات شعرها مسرح على راحتو ... قادات ميكاااب راسخ كيف ديماا مع عدساات فالكري عطاوهااا منظر اخر لعينيهاا .... هزات صاكها لي فلون الصبااط وخرجااات هابطة فالدروج تلاقات مع نسرين طالعة ... شافت فيها باعجاب : هاي هاي هاي على لالة خنساء فين غادة محلقة على الحاالة ؟؟
خنساء بعجرفة : خارجة نتسارااا ونشم الهواا النقي ...
نسرين : ايوا الالة بالصحة والراحة نتي لي جا معاك التفوااج ...
خنساء بتمياق : ومالو غايجي معاك نتي ... بااز ياختي ماتقدريش تزيدي بلاما تعلقي .. العفواا
تمشااات وهي تنطق نسرين وراها مسمعاها ليها بطنز : على مافراسكش كنت باغا ندير صحافية فالصغر ... وهاني كانرياكطي ليك بلا دبلوم ..
خنساء ضحكات وزادت من تما كاتحرك راسها بلا حول عارفاها هبيلة ... لقات رانيا واقفة قدام الباب كاتسناها ... شافت فيهااا هازة حاجبها : هاكيلي على الاناقة والشياااكة ... كاتعرفي ابنت الهم تلبسي الجلالب ...
خنساء ضحكات : خاص غير يكون عندك الفصالة لي تلبسهم وحالهم سااهل ... مني كانقوليك ربي الطرف مكاتبغييش ...
رانيا : هههههه بااز يااختي ... يلااه يللااه ...
تمشاو من تما متاجهين لبلاصة الطاكسيات حلفات خنساء ماتركب فالكوبيس وهي مقادة راسها ومتولاه ... وصلهم ديريكت للسونطر فيل قدام القهوة لي غادي يكلسو فيها ... خنساء هبطات ونطقات بتساؤل : ياختي منين عرفتي هاد القهوة كاتحمق ...
رانيا : ايوااا شفتها فالفايس وانا نقول علاش مانجربهاش انا وصاحبتي الغزااالة ... مكاينش لي تكلس فيهااا وتستاهلها من غيرك ...
خنساااء : هاحنا تاني على الهضرة الزوينةة... ( ابتاسمات ليها ): راه كانحبك انا ولاهيلااا ...
رانيا : ههههههه زيدي زيدي ....
تقدموا للقهوة ورانيا كاتشوف فالديكور والديزاين داكشي واااعر ... واخا القهوة ماكبيراش بزاف ولكن مقادة ومصايبة بطريقة تخلي اي واحد يتشهى يكلس فيها غالب عليها اللون الاسود والكري ... دورات عينيها لخنساء لي حتى هي كاترقب المكان باعجاب ... كلسوا فوحدة من الطوابل لي كاطل على الشارع ... ورانيا كادور راسها بحال الا كاتقلب على شي حاجة ....
خنساء باستفسار : مالكي ؟؟؟
رانيا : اءء لا والو غير كانشوف الديكور عجبني بزااف ....
خنساء بايجاب : وي بصح كايحمق حتى انا عجبني بزاف ...
قاطعهم اللسرباي حاط ليهم الموني ونطق بلباقة : مرحبا بيكم ...
خنساء بشكر : ميرسي ....
زاد من تما مخليهم يختارو على خاطرهم شنو غايطلبو
رانيا شافت فيها : انا اصلا جايا مشهية عندهم لي كريب شوكولااا ... شفتهم فلاباج ديالهم وعجبوني ...
خنساء سدات الموني : ضونك ناخدوهم بجوج وشي حاجة نشربوها ....
رانيا : اوك ... عيطات للسرباي طلبو شنو بغاااو وبقاو كالسين ورانيا نايضة فيها البيضة كل مرة دور عينيهااا بترقب ... طاحت عينيها على ملااك لي واقفة فلاكيس كاتهضر مع لي خدام تما وكاتعطيه فالتعليمات ... شوية دخلات للداخل باينة فيها خدامة تما وماشي كليانة ... هزات حاجبهااا باستغرااب وعاودات دااارت كاتقلب بعينيهااا تالفة مني مابانش ليها... ساطت بخفوت : اووووووف ... على زهر ...
خنساء بتساؤل : قلتي شي حاجة ؟؟؟
رانياا بتوتر : اءء لا لا ماقلت والو ...( ضحكات متلفاها) ....
جاب ليهم السرباي الطلب ديالهم حطو فوق الطبلة كان كريب مقاد على حقة وطريقو مزينينو بالفواكه الجافة والكيوي والفريز مقاد بطريقة زوينة كاتفتح الشهية ... كلسوا كايتلددو فيه ومستمعين كايحاولوا يخرجوا الفلوس لي غادي يخسروا فالكلسة مايتفاكوش ... التصاور والسطوريااات والسيلفيااات بلا حساب ... خصوصا خنساء اما رانياا حااضية مع الباب كل مرة ضرب طلة ... مدة وهي على نفس الحالة حتى فقدات الامل ورجعاات لاستمتاعها بالوقت ...
خنسااء : ياااختي حبييت لي كريب ديالهم ...
رانيا بايجاب :سيي واعر ... اجي قولي ليا بعدا كيف غادا مع نسرين باقين فالصداع؟؟
خنساء : اودي هاحنا مرة هاكا ومرة هاكا ... نهار نتفاهمو وسيمانة نتناكروا كانعديو وصافي ... وبااش نجيك نيشاان اناا طلعاتلي ديك الدار فراسي ... وعييت من الروتين فيهاا ... نهار كنت بنت كنت خالقة جو لراسي ومستمتعة مكانعمرهاش اصلاا ... داباا وليت فحال المسجونة لي درتو اليوم نديرو غدا والخطوة عندي بالحساب .. غير الله يصاوب وخلاص ...
رانيا تنهدات : والله حتى كاتبقاي فيا الصاحييبة ... ولايني مالقيت ليك جهد ... ( شافت فيها باستفهام ): واش كاتفكري تزوجي مرة اخرى الا جابتها الفرصة ؟؟؟
خنساء تنهدات : وشكون اختي كره الزواج والاستقرار ولايني راه ماشي مع اياا كااان ... مابغيتش نغرق راسي فشي زواج اخر خاوي من المشااعر ... بغيت شي راجل لي نقدر نبغيه بصح ... راجل معاه نغير هاد خنساء و نفكر ليه كيفما كانفكر لراسي ... بغيت الحب يدخل لقلبي حيت بصح ماعمري حسيت بيه من جهة شي حد ... مانكدبش عليك ارانيا ماكرهتش حتى انا نلقى شي حد لي يشد بيدي ونتبدل على قبلوا
رانيا بتساؤل : واش بصح عمرك بغيتي من قبل ... ( بفضول ): واش حتى عبدو ؟؟؟
خنساء باستهزاء : مغانكرش اني كنت كانرتاح ليه ولكن كصديق صاافي ... عمري حسيت من جيهتو بشي شعور مميز ... ماعرفتش كيفاش غانشرح ليك ولكن بكل صراحة عمري بغيتو ولا فكرت انني نبغيه شي نهار اصلا ...
رانيا : ااه فهمت .. ولكن شنو المشكل لي وقع بيناتكم وخلاكم تخاصموا على غفلة بديك الطريقة ... كنتو مفاهمين واخا هكاك ... ماعمرك عاودتي ليا ؟؟
خنساء غمضات عينيهاا بالعة ريقها ونطقات بايجاز : وعمري غانعاود ليك ارانيااا غير نساااي هاد الموضوع وسديه حسن ...
رانيا عارفاها مني كاتبغي تخبي مكاتراجعش : واخا ... ولكن فصراحة انا ماكرهتش نشوفك مرتاحة فحياتك مع انسان تبغيه ويبغيك ... ويحتارمك ويقدرك حيت بصح اصحبتي تستاهلي تعيشي سعيدة ...
ابتاسمات ليها : ان شاء الله ان شاء الله ... يلااه راه غادي نتعطلوا هو هاذا الوقت ...
رانيا شافت فالارجاء ونطقات باسى : واخا يلاااه ...
كانت باغا تلاقيهم ومتحمسة ولكن ماكتابش ومافجهدها مادير كتر ...
خلصوا وتمو خارجين مع وصلوا لباب وخنساء تصدماات مفيكسيا عينيها فجهة اللوطو لي هابط منها المهدي قداام الكااافي ... رانيا غير شافتو ووسعات ابتساامتهااا عاجبها الحال حتى قالت صافي كلشي ضاع ولكن فاخر لحظة جاا ...
المهدي شاف فالبااب وهي تباان ليه خاارجة ... هز حاجبو باستغراب وابتسامة هادية بدات ترسم على وجهوا ... تقدم لجيهتهم وخنساء مصمرة فبلاصتها تشوكااات مامتيقاش عينيهاا وانه قدامهااا ... غير كاتشوفوا قبالتها عقلها كايغيب ومكاتبقى عاقلة على حتى حااجة ...
المهدي وقف مقابل معاها ونطق بسرور : خنساااء ؟؟
خنسااء ماعرفات ماتقول ... بلعات ريقها وبادلاتو الابتسامة كاتحاول تكالما وقلبها كايضرب فالتسعين : اءء السلام ..
مد يدو بلبااقة سلم عليها : مفاجئة زوينة هادي ...
خنساء بايجاب مبعدة يدها : هههه اه صدفة زوينة ... لاباس عليك ؟؟
المهدي ماسخاش بكفها الناعم : الحمد لله ونتي عصام لاباس ومالين الدار ؟؟؟
حابسة السخفة غير بزز نبضات قلبها كايتسارعوا ورانيا مقابلة المنظر باستمتاع عاجبها الحال كاتفرج فيهم وخصوصا كادقق فنظرات المهدي وكيفاش كايشوف فخنساء باعجاب كبير ضاهر على عينيه ... ماحيدش عليها الشوفة بالمرة ...
خنساء جاوباتو : الحمد لله ... كلشي بيخير ...
المهدي : فصراحة تصدمت مني شفتك هناا ... ( نطق بمجاملة ): وفنفس الوقت عجبني الحال
خنسااء الصهدة طلعات معاهاا : اءء شكراا ...
المهدي : تفضلوا تشربوا شي حاجة .. مرحبااا ( شاف فرانيا بتذكر ): اء سمحي ليا اختي ماسلمتش عليك
رانيا ابتاسمات بمصافحة : هههه لا ماشي مشكل ( تحت لسانها ): معذور امسكين ...
المهدي : تفضلوا ...
خنساء بنفي : لا لا شكرا لهلا يخطيك ديجا شربنا وزايدون خاصنا نمشيوا تعطلنا ...
مهدي مابغاش يحكر : اااه واخا ولكن ضروري تجيو شي نهار تشرفوني ... مرحبا بيكم فاي وقت ...
خنساء : ربي يخليك ... ( كاترمش فعينيهااا )
المهدي : بالمناسبة الطياب ديال العشا كان بنين بلا قيااس ... ماكرهتش نعاود ندوق بسطيلة من يديك
خنساء نطقات بلا شعور كاضحك ببلاهة : اه مرحبا بيك اجي من غدا كااع
رانيا خرجات عينيها ناغزاها عاد حسات براسهاا شنو قالت : اءء بغيت نقول فاي وقت مرحبا عصام غايعجبوا الحال ...
يلاه غايجاوبها وهو يصوني ليه التلفون ... نطق باعتذار : واحد الدقيقة ...
دار من حداهم وجاوب وهي متبعة ليه العين ....
المهدي : الو ... وي داكوغ ... لا لا مغاديش نساااه ...( ابتاسم ): واخا احبيبتي كوني هانية ...
كلمة حبيبتي دخلات لودن خنساء فحال الخنجر ... تلاشات ضحكتها بشوية بشوية ضاغطة على سنانها ... رانيا عضات على شنايفهااا وشافت فيهااا كيفاش وجهها تلون فالبلاصة فور ماسمعات كلماتو ...
المهدي قطع ورجع جيهتهم : ايوا اخنساء فين كنا ...
خنساء بنبرة منزعجة : كنا غانمشيو اسي مهدي ...
المهدي مابغاش يحكر عليها خصوصا انه غير صديق خوها مجاتش يبقى شادها بالهضرة : واخا مانشدكمش كتر ... سلمي ليا على عصاام بزاف ...
خنساء هبطات راسها وزيرات على يد رانيا جاراها معصبة : مبلغ ...
زادت من تمااا غاتفركع كاتخطوي بزربة وهو متبع ليها العين وداير ابتسامة واسعة على وجهوا كايحك لحيتو ونظراتو ليها كلها اعجاب ... حتى بعدو عليه عاد دخل ...
خنساء وقفاات و خنزراات فرانيا : غاتقولي ليا دابا اش هاد الفعاايل ؟؟ ...
رانيا كاترمش : اشمن فعايل ؟؟؟
خنساء بعصبية : بلاما تحاولي تلعبي عليا وتبوحطي راني عارفتك بلعاني جبتيني لهنا واش عند باالك عندي الكرون ... واش عند بالك مكانفهمش
رانيا : علاش انا شنو درت ... السيد تلاقيتي معاه انا مالي فهادشي ...
خنساء : راااانيااااا ... ماتحاوليش ضحكي عليا ... هاد القهوة سميتها كافي مهدي وسبحان الله بالصدفة نتي طحتي فيها وجبتيني ليها من مور ماهضرنا علييه ... واش عند بالك كانمتلوا مسلسل هندي عامر صدف ... منين عرفتي راااه قهوتو هادي دوي ؟؟؟
رانيا عوجات شنايفها : وصافي بلاما تعصبي دابا ... قلبت عليه فالانسطااا ولقيت عندو قهوة ...
خنساء ساطت شادة على راسهاا : ععععع اراانيااا حراام عليك حرااام عليك والله ...
رانيا باسى : انا كنت غير باغا نعاونك اصحبتي والله
خنساء بانفعال : لا عاونتيني وبزاااف كااااع ... شكرااا حيت عاونتيني وخليتيني نشوفوا من بعد مانسيتو وقلت صافي مغاديش نفكر فيه زدتي الطين بلة ... ومن الفوق خليتيني نسمعوا كايدوي مع مراتو ... برافو ارانيا برافو علييك ...
رانيا حنات راسهااا كانت باغا تعاون صدقات مكفساها : ولكن انا باش غانعرف راه غايدوي مع شي وحدة ...
خنساء : واش انا ماقلتش ليك راه السيد مزوج ... صافي سدي الموضوع علاااش باقااا كاتحفري وراه ومن الفوق جبتيني برجلي لعندو ... داباا الا نواها عوجة ولا قال لعصام راه ختك جات عندي فين غادي نوليو ...
رانيا : وصافي راه قلت ليك بغيت غير نعاونك ونلاقيك بيه حيت شفتك بقيتي دايراه فبالك وزايدون ماعندو ماينوي حنا جينا للقهوة ماشي عندو ... هاااء .. ( شافت فيها بحزن ): بصح مابغيتش نضرك كنت باغا غير نعاونك ..
خنساء تنهدات : واخا ارانيا واخا فهمت ... ولكن هاد الراجل محيه من بالك نساايه ... السيد مزوج وانا مانقدرش نزيد نفكر فيه ... اصلا ماعندها حتى معنى مجيتنا لهنا ...
رانيا : ولكن اصحبتي واش ماشفتيهش كيفاش كايشوفيك ... انا متأكدة انه معجب بيك ... شكون قالنا حنا راه مزج٩ وماشي خااطب يلاااه ...
خنساء : ومن بعد بحال بحال واش بغيتيني نبني سعادتي على تعاسة مرا اخرى ... ( نفرات ): غير نساي هاد الموضوع ارانياا نساايه فمرة ها العاار ..
زادت وخلاتهاا ورانيا نطقات بايجاز مسمعاها ليها : واخا تعيااي تنكري نتي مغاديش تقدري تخرجيه من بااالك ... غير تهناااي ...
تبعااتهااا كاتجري شدو طاكسي متاجهين لدار ساكتيين وخنسااء حاسة براسها معصبة بلا قيااااس خصوصا من مور ما تفكرات كيفاش سرحات فيه تاني و سمحات لقلبها يتحكم فيها بلاما تفكر بعقلهاا فان السيد راه مرتابط ومزوج كاااع ...
ظلام الحال والليل حل ... عصام كان ݣالس فلبيت كايهضر مخاطب خنساء بشوية:صافي اخنسااء تافقنااا...غير ندخل لبيت...جي وجيبيه معااك...
خنساء حركاات راسهاا بموافقة ونطقاات بإجااب: اه تافقناا..صافي مشاات،كون هاني..غير نسمع لباب تسد ونجي لعنندكم...
عصام:مزياان نعول عليي...احم..
قطع هضرتو كايتنحنح ملي بانت ليه نسرين داخلة...دغياا سكت وخنساء دغياا هزاات تيل ديالهاا دارت راسهاا كاتفرج فشي حاجة...نسرين عاقت بلي كانو كايهضرو وغير شافوها وهماا يبدلو لموضوع...
هزات حاجبها فيهم ونطقات لاوية فمهاا:ياكما كاين بااس...شتكم غير دخلت ونتوماا تسكتووو...
عصاام:لاا...كناا كانهضرو عاادي...غير بان ليك وصاافي...
نسريين كدور فراسهاا بعدم قتنااع :مممم غير بان ليااا...شوف وكاان..زعماا مكاين واالو؟؟!
عصام:الله يهديك راه قلنا ليك مكاين واالو...
نسرين صغرات فيه عينيهاا بتشكيك:والو..متأكد..
نقزات خنساء بغاات تبتهاا ونطقات بضيق زائف:ماالكي محسوسة...راه قالك مكاين واالو
نسرين بقات كاتشوفيهم لتواني .... حركاات راسهاا متيقااهم...وناضت وقفات.. نطقاات مخاطبة عصام:انا غانمشي لبيتي...ماقادااش نتعشااا...بلا ماتعيطو علياا..
عصاام وسع نضراتو: اوااه...غاانتنعسي تااني من داباا...
نسرين ضحكاات:ههه واش فيها الى نعس من دابا....اصلا ليل هادا....
كملاات هضرتهاا وزاادت خارجة من لبييت...
عصاام شاف فخنسااء ونطق بشوية:بففف..لبلان بااينة غايضرب فزيرو...تقدر تاني ضربهاا بنعسة بحاال والو ... عرفتي شنوو....نوضي نوضي عيطي على باااا و حطي نتعشااو دغياا...
خنساء ناضت وتمشات بخطوات سريعة غادة خارجة:واخاا داباا نحطوو..مغانتعطلش....
حلات نسرين لبلاكار..جبدات منو بيجامة رطيطبة قصيرة واصلة لحد الساق فلون الأخضر الفااتح...ستايلهاا زوين حيداات ليهاا تيكي..بحكم كانت باقة جديدة يلاه خداتهااا...لبساتهاا..وتوجهات لكوافوز لكبير..خدات لبلاك ديال الشعر سرحاات بيهاا شعرهاا مزياان حتا ولا كايمشي ويجي معاهاا خلاتو مطلوق على راحتو...توحشات تكحل..ومكانتش من لعاݣزين...خداات قلم كحل..وكحلات عينيهاا من القنت لقنت كادوز وتعااود..وكتفات رموشها بشوية لمسكارا...نضرتهاا رجعاات بارزة اكتر...وخداات فغااجو زنݣات بيه حناكهاا...مع ݣلوص ملمع لشفايفهااا...شافت المراية بإعجاب
نطقاات كاضحك:هههه معرفت أشجاني ليوم على راسي وخلاني ندور بيه...لعجب...
مشاات لسرير ݣلسات فبلاصتهاا مسندة على مخدتهاا...وحطاات يديهاا على كرشهاا ونطقات كاتبتاسم: متخيلش احبيبي شحااال متشوقة نشووفك...ونهزك بين يدي...هاد تسع شهور غادي دوز طوييلة واناا كانتسنى فييك...غادي نفرح بزااف انا وباباك نهاار لي غاادي تكون معاناا فيه...الله يحفظك لياا...ويجيبك على خير
باقة كاتهضر حتاا دخل عصاام وهز حاجبو فيهاا شافهاا حانية راسهاا كدوي...ضحك بجنب:ههه الله يستر....لي شااف شي يقول الله استر...راك قريبة تحمااقي..
طلعاات فيه راسهاا وغوبشات:ماالك لقيتيني كانهضر بوحدي بااش تقولياا الله يستر...
عصاام دور عينيه على لبيت:على حد عرفي رااك كااينة غير بووحدك هناا...ولا ياكماا مابقيتش كانشوف مزياان؟!
نسرين:كاانهضر مع ولدي...راني انا ويااه هناياا..ونزيدك هواا رااه كايسمع كلشي...
عصاام:ههه شنااهوااا
نسرين:اييه...دخلت لواحد لاشين فيوتوب خاصة غير بلحاملات كايعطيو فيهاا نصائح...وقالك لأم خاصهاا كل نهاار تهضر مع لبيبي ديالهاا وهو فكرشهاا على لأقل واحد ثلاتين دقيقة مفرقة فنهااار كاامل...
عصاام وسع نضرااتو:يااك الالة...
نسرين:وييه كيف كاتسمع...ونزيدك قالك لمرى لحاملة..مخاصهااش تعصب ولا تعيش فشي ستريس فلفترة دياال لحمل...حيت هاادشي كاايأتر على لجنين ديالهاا...هوا كايحس بيهاا الى كانت مقلقة...وحتاا الى كانت فرحاانة
جاوبهاا مطول هضرتوو :هاكاااك...اوى سمحيلياا مكاانش فخبااري...هااد لمعلومات جديدين عليااا
نسرين بإبتسامة:اوى هااهياا فخباارك...
عصاام بقاا واقف كايتسنى لتوااني...ساد الصمت فلمكان...نطق مخاطب نفسو بخفوت كايشوف فلباب:وفينك أخنسااء..فينك....
نسرين بستغرااب مصغرة شوفتهاا فيه:علاش واقف هاكا...زيد تنعس...
عصاام محاول مترضش ليه لباال...قرب لحداهااا:غانعس غانعس...غير كانتسناا شي حااجة...
رداات عليه بتساؤل عاقدة حجبانها:شنوو كاتسنى..؟؟
عصاام:لا لاا واالو...(بغاا يتلفهاا) هاي هااي..ليوومة شتك دايرة لياا بلحالة..وتزنيݣة يالاالة..وتكحيلة....مممم نسرين اشهاادشي؟؟!
نسرين بتاسمات بخجل وزادو خدودهاا توردو:عوينااتك احيبيبي...بصح جات معايا تكحيلة
عصاام جبد حنكهاا:نتي...نتي لي جيتي معاهااا...
نسرين بسعاادة:اخليك ليلي...(يلاه غاتقرب لعندوو وحتاا هواا بدا كايقرب وهواا يوقفهم صوت دقان فلبااب..بعدات دايرة يديهاا على عنقهااا هازة حاجبها)معرفتش شكوون لي جاا..؟؟!
عصام ناض وقف كايضحك :ههه اناا عاارف شكوون....
تمشى بزربة و حل لبااب لقا خنساء قبالتو...هازة بواط فيديهااا...خنزر فيها وهضر بشوية:وتعطلتي..عولناا عليك بكري زعماا تقضي ليناا لغرااض....
خنساء بتفسيير:وكنت جايا لعندك..وهوا يخرج باا من بيتو وتسنيتو حتاا رجع عااد جييت...(مدات ليه لبوااطة)...هاك..ههه بصحتهااا..
عصام بمجاملة خداها عندهاا: شكرا اختيتو...
خنسااء غمزااتو:يلااه سير غاتكون كاتسنااك...غايعجبهاا لكادو غير تهنااا (كملات كاضحك غامزاه نطقات بعفوية) بااينة هااد اليلة غادوز طويلة عندكم...
عصاام تنحنح بخجل ونطق بعصبية زائفة:احم..ايوااا... سيري كوني تحشمي...سيري..
تمشاات بخطواات سريعة وهياا كاضحك...سد عصاام لباب وهو كايحرك راسو بلاحول...دار لبواطة مور ضهرو....
نسرين زادت طلعاات حاجبهاا كاتساؤل مافهما والو:شكون؟؟!..وشنو داكشي مورة ضهرك؟؟!
قرب لعندهااا وحط ليهاا لبواطة انيقة كاتبري على فخضهاا..خلاهاا تحل عينيهاا وتسدهم كاترمش بعدم تصديق...
عصام بإبتسامة:هادا الالة لكادو ديال لحمالة ديالك...عااد كتااب يجي
نسرين بتسامة واسعة ترسماات على ملاميحهاا وهياا كاتشوف فلكاادو...عينيها خرجو منهم لقلوبة....رجعاات بعض لخصلات ورى ودنهاا..وحلااتو بلهفة متشوقة تشوف شنو وسطو...كاان برفان نسائي ماركتو ممتازة محطوط فلوسط...وفجانبوو جوج كريماات ديالو واحد خاص بترطيب الجسم من بعد الدوش... وواحد خاص بترطيب ليد...منضرهم غزاال ومتيير للإهتمام
نسرين طلعات عينيهاا فعصاام لي كان كايتفحص ردت فعلهاا ونطقات بإعجااب كاتشوف فيه بعيون لامعة:وااو شحااال كاتحمق..جاادووغ....
عصاام ضحك عارفهاا كاتصطى على لبردوياات...لي ضربهاا ضربهااا على ليبرفاان ولمكيااج ولكريماات...
عصاام:عجبااتك؟؟!
نسرين:بزااف ݣااع...شحاال وانا باغة يكون عندي بارفان مااركة بحاال هذاا...ربي يخليك لياا احبيبي....(رجعات تاني كاتشوف فيه غاطيير)كاايحمق...كايحمق
عصام:اوى بصحة والراحة..تستاهلي كتر...
نسرين رجعات شافت فيه ونطقاات بنبرة حنينة:اناا ربي كايبغيني ملي رزقني براجل بحاالك لي تمناه اي وحدة...(تنهدات شداات فيديه مزيرة عليهااا... وكملات هضرتهاا وعينيهاا مدمعين)سمحلياا اعصاام الى شي مرات كانتعصب عليك ولاا كانخرج مع فمي شي هضرة مكاتعجبش...تيق بياا والله مالخاطري...كانحاول نتحكم فأعصابي ولكن مكانقدرش..عفااك....متديش عليااا..
عصام بتاسم حاس بكلماتهاا...حط يديه على تحت ضهرهاا... مقربهاا لعندوو معنقهاا و نطق:اناا كون كنت كاندير فيك الراس...كون رجعتك شحال هاادي لنجااة...ولكن عاارفك غا هبيلة.. مانديش علييك...
ضحكاات وبعداات كاتحيد لبواطة من عليهااا...وقرباات تاني لعند وجهوو طابعة قبلة على شفايفو دايرة يديهاا على جنب حنكوو...و نطقاات بنبرة صادقة نابعة من أعماقهاا...بصوت خافت خلااه يرتاااعش مغمضة عينيهاا...
نسرين:كنبغيبك اعصااام...كنبغيييك....
اصبحنا واصبح الملك لله ... واقف قدام مرايا كبيرة فبيت ديال زوجين مقاد ومتول على حقو وطريقو سرير كبييير وبلاكاار واااسع ... ديكور بسيط وهادي لدرجة كبيرة ... واقف كايقاد فالفيسط ديالو ... رش ريحتو ولبس ساعة ديالو هاز فيدو نظاراتو الشمسية وهابط مع الدروج مبتاسم ...
وصل للصالون ونطق بابتسامة وهو مخاطبها : صباح النور الزين ديال العالم ...
نادية بادلاتو نفس الابتسامة : صباح الخير .. كيف صبحتي بيخير ؟؟
المهدي بايجاب : الحمد لله ...
نادية بسؤال : قهوة ولا اتاااي
المهدي : اتاااي عافااك ...
كباتو ومداتو ليه : هاكااا احبيبي ....
هز فيها العين وابتاسم باعجاب : شفتك مقادة ومحلقة على الحالة خارجة ؟؟
نادية : نووو مخارجاش غير قلت ندور بحالتي شوية وصافي هههه ...
ضحك بايجاب وهو كايفطر : هههههه اياااه بصحتك علاش لا ...
نادية : اليوم عندك شي حاجة تقضيها ماكرهتش نخرجو نتعشاو على برا ... اش بان ليك ؟؟؟ ...
مهدي : نو ماعندي والو الا بغيتي نتعشاو اوك ... نيت سارة جاية ليوم تمشي معانا ...
نادية بسرور : وي ماتصورش شحال توحشتها الحبيبة ديالي ... ضونك صافي غانتسناوك عشية ...
المهدي وقف : اوك سا ماااغس ... ( غمزها ): مغاديش تنوضي معايا للباب ؟؟
نادية ضحكات : هههههه مابغيتيش تحيد منك هاد الطبيعة ...
حرك راسو بنفي : لااا ... نوضي يلاااه
( وقفات ): هانا اسيدي نضت ...
زاد للباب وهي تبعاتو وصلاتو ونطقات : غاتمشي لاكَار دابا ياك ..
بايجاب وهو كايلبس سباطو : وي شوية غاتوصل .. يلاه نلحقها ...
نادية : واخاا الله يسهل عليك ...
ابتاسم ليها : امين ياربي .... بسلامة ...
طبع قبلة فحنكهاا وزااد وهي متبعة ليه العين حتى ركب فلوطو ديالو عاد سداتوو ودخلات تكمل فطورها ...
خنساء حطات الفطور وكلسات كاتفطر مع نسرين بوحدهم بحكم عصام والعربي خرجوا ...
نسرين ابتاسمات ليها : ناري ماتصوريش شحال فرحت بالكادو لي جاب عصااام البارح كنت غانطير ...
خنساء ضحكات : هههه ياك ايوا بالصحة الالة حتى هو كان فرحان مني جابو ... الله يدوم المحبة بيناتكم ...
نسرين بتساؤل هازة حاجبها : خنساء واش نتي بصح مكاتحملينيش ؟؟؟
ضحكات باستهزاء : وشكون كايحملك اصلا فهاد الدار ههههه ...
نسرين ميقلت فيها : وا داوية معاك ابنادمة ... زعما واش نتي كاتكرهيني ؟؟
خنساء :، وعلاش غادي نكرهك اصلا ... ( شافت فيها ): ماعنديش سبب يخليني نكرهك ولا نحقد عليك وفنفس الوقت ماعنديش سبب يخليني نبغيك ونحن فيك ...
نسرين : نممممم زعما ماعندك سوق ...
خنساء تنهدات : ماشي ضروري نبغيو شي حد باش نتعايشو معاه ... وانا كانعرف غير نعامل الناس بالمتل وخلاااص ... ( شافت فالبراسلي ديالها فيدها ): واي حاجة دارها ليا شي حد كانردها ليه وفالوقت المنااسب وبالطريقة المناسبة ... هاذا ما كاان ...
نسرؤن عوجات كمارتها : عارفة هادشي الالة خنساء مايقد عليك غير لي خلقني وخلقك ...
ابتاسمات بعجرفة : ايييه هانتي فهمتي دابا ... ( بتساؤل): نموت ونعرف شنو قلتي لعصام على البراسلي ديالي ومنين جبتيه ... ولا زعما ماردش ليه البال ...
نسرين هزات فيها حاجبها : ونتي ماالك هاااء ... وزايدون انا قادة بشغلي نتي غير خرجي صوق هاد البراسلي حيت راه ولا ديالي ... (غمزاتهاا)ونتي لي عطيتيه لياا بخاطرك بااش نقضي ليك لغرااض...متنساايش
خنساء ضحكات : لا من هاد الناحية متأكدة انك قادة وقدود .... المهم ماعلينا انا غانوض نوجد الغدااا ونتي جمعي هاد الطبلة ودوزي معاك هاد الماعن الا جات على خاطرك ...
نسرين : مممم واخاا ... خنساء زادت للكوزينة وهي هبطات عينيها لبراسلي ديالها كاتفكر الا شافو شي نهار عصام ولا رد ليه البال اشمن كدبة غاتقول ليه ... تنهدات وناضت كاتجمع الماااعن ...
مهدي وقف اللوطو ديالو قداام لمحطة ديال التراان...هبط ووقف مربع يديه مسند على اللوطو ديالو لابس نضراتو الشمسية...كايتسناهاا تخرج عندو...تواني حتا تحل لباب الرئيسي ديال المحطة أتوماتيكيا وخرجاات منو فتااة عشرينية جارة فاليز فيديهااا...تقدماات لعندو وابتسامة مزينة حروفهاا لكحلين...ومخليه عويناتهاا لكباار ولمشفرين يباانو لاامعين...بتاسم ليهاا مهدي وغير قربات لعندو كاتجري حاالة يديهاا بجووج وطارت علييه معنقااه بحرارة...بقاا على نفس لإبتسامة وبادلهاا لعنااق بحرارة موحشهااا....بعدت عليه ونطقات بنبرة فرحة:مهدييي...مااتخيلش قدااش توحشتك...
مهدي بإبتسامة كايمسح على شعرهاا الأسود البوكلي بحناان:حتاا انااا الغزالة ديالي ...
يلااه كانت غاترد علييه وهو يقاطعهم صوت شااب من لوور...
كاينطق بهدووء:يلاه اسارة بسلامة عليك وفرصة سعيدة ملي تعاارفنااا...
مهدي هز حاجبو فيه وحيد نضاضرو وشاف فيه مخنزر...شي لي خلى الدري يفهم رااسو ويقلب الدورة يمشي فحالو بلا مايتسنااهاا ترد علييه....
سارة بقاات كاتشوف فجيهتوو وهوا يقفزهاا صوت مهدي كارز على سنانو:وااش نتي مباغااش تحيدي هااد لقااعيدة لي مااليهاا معنى...فكل مرة تجي فيهاا خااصك تشدي لحديت مع شي وااحد وتقرقبي معااه النااب طرييق كاملة...مكااتحشمييش
ساارة لااوية فمهاا:سيد جاا هضر معاياا..شنوو بغيتني نباان قداامو معقدااا ومانبغيش نهضر معااه...بيااسووغ نووو...
مهدي زااد خنزر فيهاا كايشوف فيهاا بحدة...وهياا تعوج شفايفهاا ونطقاات مرققة صوتهاا:اوووف.... مالك تاني غاتعصب...نتاا عاارفني اجتمااعية وكووول مع كلشي...مايمكنش ليااا ندوز هااد الطريق كاملة وانا سااكتة ضروري نهضر...اومبلييس عاادي غير صديق جديد ماافيهاا واالو...(كملاات بإبتسامة)دااكووغ
مهدي سااط بصوت مسموع وعاود لبس نضااضرو ماباغيش يتناقش معاهاا فشااريع...نطق واخد عندهاا لڤاليز:طلعي طلعي...من بعد نهضرو على هاادشي من بعد مااشي هنااا...
ضحكاات هازة كتفهاا بلا مبالاة وركباات لقداام لابسة حزام الأمان...مهدي حط لڤااليز ديالهااا فلكوفر سدوو ومشاا ركب ديماارة اللوطو وزااد...
نطقاات سارة وهياا كاتشوف فتيل وتقااد بعض من خصلاات شعرهاا الكتييف:اوى...صافااا....قولي شنوو طرى فغياابي...
جاوبهاا بإجاز كايشوف فطرييق:ممم عاادي... تقريبا مطرى واالو....كيفماا خليتيناا...
ساارة حطاات يديهاا فجيهة عنقهاا كاتقاد فلبسة ونطقاات بإعجااب:دي مواا..كيف جااتك هااد لكسيوة لي لاابسة..سي تخي جوولي يااك....خديتهاا غير لباارح...حمقااتني
مهدي دور عينيه عليهااا ورجع شااف فطريق:وي زويينة...ولكن كون كاانت هاابطة كتر كانت غاتكوون حسن...
سارة هزات فيه حااجبهاا: مي نووو تكون تاني هابطة كتر من هااكة غادجي فشكل...
مهدي ضحك بجنب كايحرك راسو بلا حول :لي ضربك ضربك على لحواايج... وشري هادي وحط هاادي....معرفتكش امتاا غاتسالي من هااد تخرببيبق...
سارة:ماسميتووش تخربيق...سي لاامووض..ومكايفهم فيهاا غيير لي كلاااص وشييك...بحاالي...
مهدي ضحك:ههه وخاا مقلتي عيب...اوى حتاا تمشي عند ناادية وسوليهاا كيف جااتك...
سارة وسعاات نضرتهااا ونطقاات بنبرة مطولة:اووميݣاااد..ماابييل مااتخيلش قدااش توحشتهاا حتاا هيااا..بزااف
مهدي بتااسم محرك رااسو... وكملوو طرييقهم كايدردشوو مع بعضهم...حتاا وصلو لداار
خنساء كاتوجد الغدا فالكوزينة كادندن بصوت عالي :
وردة على وردة قالو ماذا جرى ... قلت انا الميمة قلبي مجروح
كية على كية قولو لي كواني ... لي مشا وخلاني علاش بالو هاني
دمعة على دمعة قولو لحبيبي ... لي مشا بلا رجعة هادي هي دنيا
ساهية مع الاغنية كاتسمع ليها وتغني معاها حتى قفزها صوت رانيا من اللور :بقاي تغني وردة عل وردة حتى يطرا ليك ما طرا لسعدية فلخر ...
خنساء حطات يدها على قلبها مخلوعة : اناري مالكي اصحبتي على هاد الدخلة غير ديري الحس ...
رانيا سكتات الاغنية : وانتي لي ساهية مع الاغنية ... مخشعة ياربي السلامة ...
خنساء مسحات يدها : جيتي بعجاجتك ... اهيا العالي مالكي مكشكشة على الصباح ...
رانيا هزات كتافها : نتي لي معصباني ... سادة عليك ومغبونة ومن الفوق كاتسمعي لهاد الهم والغم ... راك تجيبي الجلطة ماشي غير الاعصاب ...
خنساء : باااز يااختي الهضرة نتي لولة فيهااا ... دابا غير قولي ليا اش جابك على غفلة هاكا ؟؟؟
رانيا : جيت غير نشوفك كيف بقيتي من البارح بقا بالي معاك ... ( ضحكات ): كيف بقا القلب ...
خنساء بلا حول : ربي واش نتي مابغيتيش تعياي من هاد السيناريووو ...
رانيا بايجاز : لا اختي مغانعياااش ... البارح الليل كامل وانا كانفكر كيفااش هاد السيد غايكون مزوج وهو كايشوف فيك بديك الطريقة وكايدوي معاك هكاااك ... اويلي السيد راه حواااال ... وهو باين كلاص ماشي ديااال يضرب لجوج جوايه باينة فيه مأدب وماشي ديال هاد الت*حبين
خنساء : ومن بعد ... انا بعدا مارديت البالو لوالو ... ( ربعات يدها ): واخا الالة نديوك على قد عقلك ونقولو هاد السيد شاف فيا ... ايوا وعصام لي قال راه مزوج والخاتم لي فيدو والهضرة لي سمعناه قالها فالتلفون ... اش كاتقولي فيهم ...
رانيا باسى : ايييه راني عاارفة ولكن راه اي حاجة ليها مبرر ... وزايدون انا خايفة غير يصدق مامزوجش وتديه ليك شي وحدة اخرى وتندمي تاني ... وتحماقي ليا فحال هادي لي كاتسنطي ليها دابااا وغانوحل فيك غير انا ...
خنساء جابت ليها الضحكة : هههه واش من نيتك الحمقة ... علاش اختي غير هو لي راجل فالدنياا وزايدون انا راه غير عجبني ماشي طحت فيه ... يوماين ولا تلت يام نشوف حسن منو ونسااه ... غير نتي لي معمرة راسك بالخوا الخاوي ..
رانيا : ايوا اختي نتي تعرفي ... انا غير قلت وصافي ... قلبك هاداك ونتي تعرفي ليه
خنساء : ههههه ايوا ونتي اش خبار قلبك ؟؟
رانيا ضحكات : قلبي انا كايتسناني نمشي عندو ... دزت عندك نتي لولة عاد نمشي نشوفوا راه مخلياه كايتشمش فالجردة
خنساء : اواااه فهاد الكَيالة ... اناري مالكم على حالتكم
رانيا : هههه الحيبان عندي مشغول فينما لقا شي وقت كايعيط ليا نجي نشوفوا بالخف ... يلااه هانا مشيييت تهلاي
خنساء بلا حول : هههههه الله معاااك
زادت من تما كاتجري خارجة فحالها ... وخنساء بقات كاتكمل شغالها ... حتى دخل العربي عندها للكوزينة : خنيستي اش سايرة ديري ؟؟
خنساء : لقيتيني عاد ساليت الغدا اباا ... جيتي بكري اليوم ..
العربي بايجاب : اييه جيت على قبلك ابنتي ... بغيت ندوي معاك دوزي تبعيني
خنساء هزات حاجبها : ياكما كاين باس ؟؟
العربي : لا والو باس غير اجي اجي ... زاد للبيت وهي تابعااااه بفضول باغا تعرف اش بغاها
دخل العربي عندها للكوزينة : خنيستي اش سايرة ديري ؟؟
خنساء : لقيتيني عاد ساليت الغدا اباا ... جيتي بكري اليوم ..
العربي بايجاب : اييه جيت على قبلك ابنتي ... بغيت ندوي معاك دوزي تبعيني
خنساء هزات حاجبها : ياكما كاين باس ؟؟
العربي : لا والو باس غير اجي اجي ... زاد للبيت وهي تابعااااه بفضول باغا تعرف اش بغاها
خنساء كلسات مقابلة مع العربي .... وهو نطق بهدوء : على ما بان ليا قنطتي فالدار ابنيتي ...
خنساء تنهدات : واييه اباا ماتصورش شحال ...
العربي : ايه عارف عارف ... راني شفت واحد التكوين حل جديد قريب لينااا وقلت الا بغيتي دخلي ليه تعلمي شي صنعة ولا حرفة دوزي بيها الوقت وتديري شي حاجة فيدك ...
خنساء فكرات فهاد المسألة من قبل مي ماحساتش براسها مرتاحة فيها : ولكن ابا انا صراحة ماعنديش الكانة نتعلم شي صنعة ... ومانكدبش عليك اباا الراس ديال لي يبدا يتعلم من جديد مابقاش عندي ...
العربي : علااه مالكي ابينيتي اش فيها الا دخلتي خديتي الصنعة الخياطة ولا الطرز ولا لي بغيتي ... عطا الله ما ديري حسن ليك من هاد الكلسة فالدار ...
خنساء تنهدات: فهمت ابا ولكن انا فصراحة بغيت ندير شي مشروع ... بغيت نخدم ابااا ماشي نتعلم شي حاجة مامرتاحاش فيها ...
العربي : راه هضرات معايا عمتك فهادشي ولايني راه قلت ليها خليني نفكر ... نتي باقا صغيرة ونخاف تصدقي مضيعة رزقك على الخاوي ... ويرجع عليك كلشي بالخسارة ...
خنساء : لا ابااا انا والله حتى عارفة شنو باغا ندير ... ورانيا غاتشارك معايا وغانكريو شي محل صغير نديرو فيه الحوايج نعمروه براس المااال لي عندنا وبشوية بشوية حتى نوقفوا على رجلينا ...
العربي : انا هادشي باقي مامرتاحش ليه ... المهم من بعد ونشوفوا هاد القضية ماشي دروك ... دابا الا بغيتي دخلي تسجلي مني يبدا التقياد سيري ختاري اش بغيتي ديري وعمري وقتك ...
خنساء بحزن : واخا غانفكر ابا ونرد عليك ...
العربي : هكاك ابنتي الله يرضي عليك ... ونوضي عافاك حطي لينا ما نااكلوا راه مصارني كايغوتو ...
حركات راسها بايجاب ناضت بلا عكز توجد ليهم الغدا ... قاداتو وحطاتو منين جا عصاااام ... وكلاو مجموعين
تعاشات العشية وليل حل وظلامو خيم على المدينة ... وقفات اللوطو ديال مهدي قدام ريسطو زوين بسيط وهادي جنب البحر ( مهدية ) ... هبطات نادية من حداه وهو شاد على كتفها بجلابة انيقة وزوينة فالبيج وفولار لايحاه على راسهااا ... واخا كبيرة فالعمر ولكن باقا مهلية فراسها وصحتهاااا ... حاط مهدي يدو على كتفها مبتاسم وحداهم سارة بكسوة كلاص حد الركبة وزايدة عليهاا كويرة من الفوق على قبل البرد ... مخلية شعرها بوكلي مطلوق على راحتووو ..
تقدموا مجموعين وكلسو فطبلة كاطل على البحر ... لي امواجو مجهدة بحكم الحال بارد نوعا مااا ... الجو وااعر خصوصا فليل كايخلي اي واحد سارح فيه
مهدي بابتسامة : شحال هادي ماخرجتي ... قصرت فحقك هاد الايام ياكي ...
نادية : ماشي مشكل احبيبي عارفة خدمتك ... عاذرااك ...
سارة : ياختي على الحب غير كايتشاير ... لي سمعكم مايقولش ام وولدهااا ... انا بعدا جادووغ لا غولاسيون ديالكم والله قليل فين كانلقاوها فشي فامي ..
نادية ضحكات : علاش مالها شنو لي جاك غريب ؟؟
سارة : اشمن غريب انا راه ولفت هادشي من ديالكم من الصغر مي ماشي كاع الامهات وولادهم كايكونوا فحال دي زامي هاكا ...
نادية : هههه ايوا بسيف نكونوا صحاب راه ولدتو صغيرة وكبرت معاه ... شنو زعما جاتك الغيرة ؟؟
سارة : هههههه نووو جااامي ... غير قلت وصافي ...
المهدي كايشوف فالموني مكونسونطري معاه مخليهم كايدردشوا مع بعضياتهم ... طلبوا شنو بغاااو وكلسو كايتعشااو ناشطين ...
سارة بتساؤل : ايوا امهدي كاين شي جديد ولا باقي سيلي ؟؟ ...
المهدي بلا حول : ونتي مالك .. علاش كاتسولي ؟؟ ...
سارة : بما ان مكاين والو ... مممم غالبا غاتكون توحشتي الايكس ..
نادية خنزرات فيها : سااارة !!!
سارة : مالي شنو قلت ... مراتو لولة ماشي عيب يتوحشها اون بليس مغاديش ينكر انه كان كايبغيها واحد النهار اولا اميدو ...
المهدي : لا الغزالة ديالي غير تهناي ماتوحشتهااش ... ومكانفكرش فيها حيت صافي تفارقنا هي الله يسهل عليها وانا نفس شي ... واش موضوع داز عليه عام باقي نتي ماباغاش تسديه فينما كاتجي كاتعاودي تدوي عليه ... ماشي عيقتي لا ...
سارة : داكوغ اسيدي هاني نسكت ...
المهدي : كيف غادا مع القرايااا ... كلشي مزيان
سارة : صااافااا ... المهم راك عارف كل عام البروكرام كايصعاب على لي قبل مي اون جينيغال مزياان
المهدي : ايوا صبري هاد عاماين لي بقات ليك ومن بعد غادي ترتاحي ...
سارة : ان شاء الله ... انا نيت ديك المحمدية طلعات ليا فراسي ... توحشت keni ( قنيطرة )بزااف
نادية: مابقا قدما فات احبيبتي ...
سارة ( بتذكر ): فكرتيني امهدي بغيت نطلبك عافاك ...
المهدي كياكل : وي شنو ؟؟؟
سارة : بغيتك تمشي دير معايا شوبينغ غدا سيلتو بلي ..
هز حاجبو فيها : وااات ... كيفاش شوبينغ حماقيتي لااااا
سارة : مالها اش فيهااا غير غاتونسني ... عارفني مكانعرف حتى واحد هنااا ... بلييز ... ماعندي معامن نمشي
المهدي بنفي : لا غير شوفي الواليدة تمشي معاك ولا سيري بوحدك مكاين لي ياكلك ...
سارة دلات شنايفها بتفشاش ... شافت فنادية برجاء...
نادية نطقات بطلب : عافاك اولدي سير معاها ... راه ماعندها معامن تمشي ... وانا مافيا لي يبقى يدور معاها من هنا لهنا ... الله يرضي عليك ...
المهدي بايجاز : لا انادية ماعندي ماندير معاها واش مكاتعرفيش بنتك من محال لمحال ومن مول لمول بغيتي تحمقني ... غير عفيني انا ...
سارة : والله امهدي مغادي نعطلك ... غانمشي لواحد البوتيك عاد حل جديد شفت البيب ديالو مني كنت فالمحمدية وجيت معولة نمشي ليه وغدا دايرين صولد .... مابغيتش نضيع هاد الفرصة الله يخليك ...
المهدي برفض : لا هي لا .. صافي راني دويت معاااك ...
سارة برجااء : سيل تو بلي ... والله مانتعطلوا وراه قريب عاد حل فاولاد اوجيه وغدا دايرين برومو وااعرة عاافاااك ... ماشي حرام عليك
نادية باقناع : غير سير معاها اولدي على وجهي عارفهاا كيف دايرة مغاديش تسكت تاني ... واخا
المهدي تنهد مايقدرش يخصر خاطر ماماه ... حرك راسو بايجاب : واخا ولكن مغاديش نفوت معاك ساعة ديال المكانة ...
نادية : الله يرضي عليك
سارة بفرح عنقاتو : يااااااس لهلا يخطيك علياااا ...
ضحك كايحرك راسو بلا حول وكمل ماكلتو ... موضوع يجبد موضوع حتى سالاو العشاا وناضو يتمشاااو مجموعين جنب البحر ... عاد رجعوا للدار ناشطييين وفرحااانين ...
شمس جديدة طلات على مدينة القنيطرة كتعلن على استقباال يوم جديد....
دخلو نسرين وعصام من عند الطبيبة مختصة فأمراض النساء والتوليد ..مشات عندهاا نسرين باش تطمأن على صحة الجنين..وتبقاا متبعة معااهاا حتاا تولدهاا...
عصاام سد لباب و نطق بنبرة امرة مخاطبها:يااك سمعتي الطبيبة شنو قالت...خاصك تعطي الراحة..وماتعصبيش نهائيا فهااد لفترة...اي حاجة ولو تكون بسيطة تقدر تأتر على لبيبي...
نسرين ساطت:اووف..واصافي مالكم دابا كاتخلعو فيااا...ان شاء الله مغايوقع والو...وولدي غادي يجي لدنياا بخير وعلى خيير...
عصاام:وانااا غاا قلت ليك..حيت عاارفك على أبسط حاجة كاطلعي كاطرياام وتكبريهااا....
نسرين:وصاافي تهناا مغيوقع واالو غير رتااح...
دخلو لقلب الداار، دازو من حداا لبيت وبانت ليهم نصيرة ݣالسة مع لعربي...تقدمو لعندهم وسلمو عليهم
لعربي:على السلامة...ياك بعداا لأمور مزيان شنو قالت ليكم الطبيبة؟!
عصام بإجاب:لحمد الله الوليد..كلشي بخير وعلى خيير
نصيرة بتاسماات :اوى مزياان...(شافت فنسرين كاتساؤل بهتماام)قولي لياا...امدرى، بنت ولا ولد
نسرين طلعاات فيهاا حاجبهاا: اويلي على بنت ولا ولد..باقي مكمل حتا شهر فكرشي بااش غانعرفووه؟...
نصيرة:ايه ايه بصح... اودي بحال لولد بحاال لبنت...المهم هياا صورة الكااملة...
عصاام برجااء:هاداكشي لي كانتمنااو..لي جاات من عند الله مرحباا بيهااا...
نصيرة:غيير هواا اولدي عصاام..الله يرضي علييك..الى كان ولد سميوه لي بغيتو شغلكم هداك...ولكن الى كانت بنت اناا لي غادي نسميهاااا...
نسرين خرجات عينيهاا شافت فيهاا عاقدة حجبانهاا:ك..كيفااش نتي لي تسميهاا مفهمتش؟؟!راه انا واقلة لي غادي نولدهاا ماشي نتي
عصام نغزهاا باش تسكت عارفهااا تاني غاتشعل...خرج بتسامة خفيفة على ملاميحوو وشاف فنصيرة ناطق بهدوء:لا ماشي مشكل اعمتي..صافي سميهاا نتي مرحباا
نسرين زيراات على يديهاا عوجاات شنوفتهاا كاتغمز فيه:عصاااام..
حمر فيها الشوفة وهيا ضرب يديها مع فخضهاا وسكتاات ملبداهاا فخاطرهاا..
عصام من طبعو ديماا مكايبغيش يخسر لعمتو واخا معرفت شنو يوقع..مكانتهاا كبيرة عندو فمقام مو..عاود شافيهاا ونطق:هاانياا اعمتي..قولي لياا شنو بغيتي تسمي...
نصيرة غوبشاات كاتشوف فنسرين لي ݣالسة على أعصابهاا معاجبهااش لحال بلمرة:إوى معرفت ماال مرتك ݣالسة تنفخ وتفش غير بوحدهاا..وتعوج فقنوفتهاا عليناا..مابغاتنيش واقلة نسمي...
عصاام:دابا اناا لي كانهضر معااك ماشي هياا...شنو بغيتي تسمي بنتناا الى كتااب...
نصيرة بتقة: غادي نسميهاا عيشة...
عصاام وسع نضرااتو..نسرين ودينيهاا بدااو كايصفروو بلعصااب و زادت كملاات عليهاا بسمية... ولعربي حتا هواا شااف فيهاا بهتماام ونطق:شنو قلتي انصيرة؟؟!
نصيرة بإبتسامة:اييه..عيشة لي غادي نسميوهاا...تسمى على سميت موو الله يرحمهااا...اناا عطيت لعااهد لراسي...لحفيدة اللولة لي غادي تزاد عندناا سوى بنت عصاام ولا بنت خنسااء..نسميوهاا عيشة...(كملات معوجة شفايفهاا كتبتااسم)ودابا ان شاء الله غاادي نسميوهاا لبنت عصاام....
نسرين خرجاات نفس بصوت مسموع..مابقاتش قادرة تصبر..محدهاا كاتهضر وهياا كاتزيد تجعر...شافت فيهاا عاقداهم فتسعين ونطقاات بنفعاال:وااش انصيرة من نيتك..بنت صغيرة غاادي نوضو نسميوهاا عيشة...وااش حمااقيتي ولا حفات ليك غاقولي ليااا؟؟!
نصيرة بلغواات:على ماالهاا سميت عيشة كيف جاتك...مزينهاا سمية...
جوباتهاا بنزعااج:شوفي نتي كيف جااتك...اويلي واخا معرفتش شنو يطرى منسميهااش لبنتي...مالني موحشة نعقد الدرية مسيكينة...
لعربي خنزر فيهاا:علاه ابنيتي نسرين مال سميت عيشة...علااش معجباتكش؟؟!
نسرين:ماشي معجبتنيش اعمي...ولكن سمية ديال لكباار.. ماشي درية صغيرة يلاه تزادت...
نصيرة:ويلى كاانت ديال نااس لكباار..شنو فيهااا... مالهاا غاتبقاا صغيرة بجغوطة ماغتكبرش..وزيدون بزاف دابا رجعو كايسميو سمياات لقداام...(شافت فعصاام لي ساكت ومن وجهوحتا هواا معجبتوش سمية وكملات مرفعة نبرة صوتهاا)ودوي نتاا مالك سااكت..عطينا خو جوابناا...شتك غير سمعتي سمية. هياا تشدك الساكتة...ياكماا حتاا نتا معجباتكش؟!
عصاام شاف فيهاا..بلع ريقوو..وجاوب بهدوء محاول مايبينش:لا لا الله اودي...سمية مزيانة....صافي مايكون غير خاطرك...نسميوهااا...
نصيرة ضحكاات:اوى هااكااك الله يرضي عليك...
نسرين مابقاا ليهاا والو وتغوت من حر الفقصة لي حاسة بيهااا...مبغااش دير شي ردت فعل قدام لعربي...ناضت وقفات شافت فعصاام بعصبية ونطقات كاارزة على هضرتهااا محاولة تبرد راسهاا غير بزز:عصااام تبعني عفااك بغيييتك...
كملات هضرتهاا وخرجات طالعة ليهاا بلمعقول من لبيت...ستأدن منهم عصام بهدووء وتبعهاا لبيتهم...
نطق مخنزر:مالك تااني يااك لبااس؟؟
نسريبن ندباات حنكهاا بجهد حتاا تطبع بضفارهاا من لفقصة:اوييلي وحدي...وااش مسمعتيش عمتك اش بااغا تسمي لياا لبنت...أويلييي على عيشة...هاادي باغة تخليني ندير صباعي فودني ونغووت يسمعوني جيراان.....
عصام ساط بنفاد صبر عارفهاا غتاخد موقف من السمية:داباا حنا كلشي نديرو منو مشكل...مالكي عزيز عليك تكبري لموضوع...اشفيهااا الى سيمناها على مي الله يرحمهاا...وحنااا مغانعيطوش ليهاا عيشة...غانوليو نعيطو ليهااا عائشة...صافي عجبااتك...
جوبااتو بلغواات كاترعد بلأعصاب لي ركبوهاا:وتقوول وااش نسميهاا ديك سمية واخا تبقى غير هياا...شتي نحلف لييك بالله واخا نعرف نخلي بنتي بلا سمية مغاانسميهااش عيشة..وقوول لعمتك تسطح رااسهاا مع لحيط...تمشي تقلب ليهااا على شي رااجل لي تولد معااه وتسمي ديك الساعة لي بغاات...الله ينعل لي يعاارضهااا...
قاطعهاا عصاام بنبرتو القوية:أييه جمعي فمك..راه واقلة عمتي هاديك لي كاتهضري عليهاا ماشي وحدة مصاحبة معااك ولا گرينتك...عرفي شنو كاتقولي حسن منهرس ليك داك دلقووش لي غااكايسرسب بلاا حبااساات....
نسرين بنفس للإنفعاال:عمتك اعصاام مابغاتتش تفرقني..مباغاش تعطيني بتيسااع...عزيز عليهاا تخشي نيفهاا فأي حاجة متعلقة بيناا بجووج.... ولااادي رااه انا لي منحقي نسميهم ماشي هيااا.. اناا لي صابرة للمرض تاع لوحم ولوجع تااع لولاد لي جاي فطريق ولعداب دياالهاا...كااتسمع
عصاام بغاا غايسلك معااهاا ويسايس حيت حاملة خايف...بلخصوص ملي شااف وجهاا حمر بلأعصااب ولعروق جنب عنقهاا باارزين كايعبرو على لغدايد لي حاسة بيهم لدااخل :وصاافي انسرين بردي راك حاملة..صافي داباا ماوقع والو....هاانتي بااش نحلو اللالة حناا ݣاع هاد لمشكل...ومايبقاش فيك لحال لانتي لا هياا...غادي نحطوهاا فلورااق بسمية لي بغيناهاا حناا وجااتنا على ݣانتنا...ونخليوهم هما يعيطو ليهاا بلي بغااو...صافي مزيانة؟؛
ضرباات فخضهاا بجهد زااد جعرهااا: اويلي على الراااجل...(زاادت غوتاات)ياااك اسي لفااهم...زعماا عند بالك مطور....علاه اسيدي نااس كايتبعوو شنو كاين فلوراق ولا شنو كايسمعوو...ادوييي....
عصام مسح على جبهتوو مبقااش قادر يصبر ونطق مخسر فيهاا الشوفة:عييت انسرين من مشااكلك مع عمتي لي مكاتساليش..بالله حتاا عييت...
ردت عليه موسعة نضراتهااا:واناا معيتش..اناا كرهت نعيش هانيا معاهاا بلا مشااكييل...رااه هياا لي كاتجبدني هيااا...(عينيهااا عمرو بدمووع وكملات بنبرة باكية)هء هء ضلم هادا اعصاام...والله حتاا الضلم...رااه انااا لي خاصني نسمي بنتي...انااا
باقة كااتهضر حتاا حبسهاا وجع خفيف خفيف شدهااا تحت كرشهااا...منعهاا من النطق...حطات يديهاا عليهااا و خسرات ملاميحهاا بألم وغمضاات عينيهاا بشدة...عاضة على شفايفها بألم...عصاام تخلع وقرب لعندها شادهاا من درااعهاا ونطق صااعر:شتي لمرض تااع والو....رااه قلناا ليك ازفتة رااك حااملة متعصبيش..ولكن نتي رااسك قاااسح....برب مغاتهنااي حتاا تجيبيهااا فراسك ولا داكشي لي فكرشك
ݣلسهاا على سرير.. نطقات كاتهضر بشوية كاتحااول تدخل النفس:ج...جيب لياا كااس تلماا..مكااين لي غاادي يولدني قبل لوقت قد عمتك وفقايسهااا...رجعت كلي كاانتوجع بسباابهااا
عصام بخوف:واااش كاتحسي براسك مزياان؟؟...يلااه يلااه نديك عند الطبيب...
نسرين حلات عينيهاا ونطقات بإمتنااع :لا لا بلاش..صافي فاتني لحاال...جيب لياا غير كاس تلماا...
عصام تنهد ومشا طاير يدير ليهاا لي بغاات... نسرين دارت يديهاا لي كانت كاترعد على وجهاا....حاسة بلبكية واحلة ليهااا...عارفة بلي كلاام نصيرة كايدير بيه عصاام وميحطووش للأرض...وهادشي بحد داتو كايخليهاا تبغي تااكل جناابهااا...واخاا دااز وقت طويل فزواجهم مزاال منجحاتش تكسبو وديرو فصفهااا...وتخلي كلمتهاا تمشي علييه...ويدير لي بغاات هيااا...